"Metallurg" va "Navbahor" jamoalari o‘rtasidagi uchrashuv yakuniga yetgach har ikki jamoa vakillari ishtirokida matbuot anjumani bo‘lib o‘tdi. Matbuot anjumanida jamoamiz bosh murabbiyi Ilhom Mo‘minjonov va o‘yinning eng yaxshi futbolchisi Azizbek Turg‘unboyevlar ishtirok etishdi.
Ilhom Mo‘minjonov: - Bugungi uchrashuv durangga mos bo‘ldi. O‘zinglar guvohi bo‘lganlaringizdek maydonda jangovar o‘yin kechdi. Bahs davomida futbolchilarimiz ham, raqib jamoa a’zolari ham darvozalar oldida o‘ta xavfli vaziyatlarni yarata olishmadi. Kurash asosan markazda kechdi. Shu sababli qayd etilgan durang natijani adolatli bo‘ldi deb o‘ylayman. Futbolda har qanday holat ro‘y berishi mumkin. Standart vaziyatlarda imkoniyatlardan foydalana olmadik. Chempionatning dastlabki uchrashuvi bo‘lganligi uchun shogirdlarim xohlaganimdek o‘yin ko‘rsata olishmadi. Shunga qaramay, yigitlarga iroda namoyish qilib, maydonda borlarini berishgani uchun rahmat aytaman. Sababi oldimizga yuqori marralarni zabt etish qo‘yilgan. Bunday sharoitda har bir ochko oltinga teng bo‘ladi. Keyingi uchrashuvlarda yo‘l qo‘yilgan xatolar ustida ishlab yaxshiroq natija qayd etishga harakat qilamiz. Muxlislarimizga teng keladigan ishqibozlarni topish mushkul. Bugun ham jamoani qo‘llash uchun yo‘l bosib kelganliklari uchun minnatdorchilik bildirib o‘taman. Kelgusi turlarda chiroyli o‘yinlar namoyish etib muxlislarimiz ishonchini oqlashga harakat qilamiz.
Azizbek Turg‘unboyev: - O‘yin ko‘rganlaringdek shiddatli ruhda kechdi. Bugun Bekobod shahriga g‘alaba qozonish uchun kelgandik. Bu yilgi chempionatda oldimizga yuqori marralarni zabt etish vazifasi qo‘yilgan. Shu sababli har bir o‘yinda ochkolarni qo‘lga kiritish muhim hisoblanadi. "Metallurg" jamoasiga qarshi uchrashuvda qo‘ldan kelganicha harakat qildik va yakunda safarda bir ochkoni qo‘lga kiritdik.
"Navbahor" FK matbuot xizmati.
