Biroz avval “Lester” klubining aljirlik yarim himoyachisi Riyod Mahrez futbolchilik faoliyatini yakunlagani haqida xabar bergan edik.

Futbolchi o‘zining Facebook’dagi rasmiy sahifasida shifokorlar maslahatiga ko‘ra, ushbu qarorni yaqin kunlarda qabul qilishini yozib qoldirgandi.

“Ko‘plab shifokorlarning maslahatlariga ko‘ra, futbol bilan xayrlashishga qaror qildim.

Ha, hozir o‘qiyotganlaringizning barchasi haqiqat, men faoliyatimniya yakunlayman.

Ajoyib shaharda meni qo‘llab-quvvatlagan va maydondagi harakatlarimni yuqori baholagan barcha muxlis va yaqinlarimga tashakkurlar aytaman.

O‘tkazgan vaqtim va futbolchi bo‘lganimdan hech qachon afsuslanmayman. Bu lahzalar doim yodimda qoladi”, deya yozgandi Mahrez.

Lekin mashhur jurnalist Lyuk Tanzining berayotgan xabariga ko‘ra, Mahrezning Facebook’dagi sahifasi xakerlar tomonidan buzib kirilgan va qoldirilgan so‘nggi postdagi barcha so‘zlar yolg‘on hisoblanadi.

Bu xabarning yolg‘onliga yana bir misollardan biri shuki, Mahrez bundan 12 soat oldin Twitter’dagi sahifasiga “Bornmut” jamoasiga urgan golining videosini joylashtirgan.

Ma’lumot uchun, 2015/2016 yil mavsumida “Lester” bilan Angliya chempioni bo‘lgan aljirlik 27 yoshli futbolchi xizmatlariga yozda “Roma”, “Chelsi” va “Barselona” klublari qiziqish bildirishgan edi.

Shuningdek, “Manchester Siti” ham futbolchini sotib olish uchun jiddiy kurashdi.