Xabaringiz bor, o‘tgan yilning 17 oktyabr kuni O‘zbekiston Futbol Federasiyasi Prezidenti Umid Ahmadjonov Qatar Futbol Uyushmasining Prezidenti Shayx Hamad bin Xalifa Ahmad ol Taniyning taklifiga ko‘ra Dohaga xizmat safari uyushtirib, Qatar futboli mansabdor shaxslari bilan uchrashgandi.

Qatarda bo‘lib o‘tgan uchrashuv chog‘ida tomonlar O‘zbekiston va Qatar futbolini yanada rivojlantirish uchun hamkorlik aloqalarini kuchaytirish yo‘lida memorandum imzolagandilar. Shuningdek, Umid Ahmadjonov Qatardagi dunyoga mashhur “Aspire” akademiyasiga tashrif buyurib, u yerdagi sharoitlar bilan tanishgan holda, O‘zbekistonda ham ana shu tajribani yo‘lga qo‘yish borasidagi hamkorlik masalasida kelishuvga erishgandi. 

Qatarning dunyoga mashhur “Aspire” jamoasi Osiyoning eng yaxshi akademiyalari tarbiyalanuvchilari ishtirokida tashkil etayotgan musobaqaga, ikki mamlakat futbol assosiasiyalari o‘rtasidagi memorandumga asosan O‘zbekistondan ham futbolchilarni taklif etdi.

Mazkur musobaqada 2000, 2001 va 2003 yilda tavallud topgan yosh futbolchilar ishtirok etishadi. O‘zbekistondan mazkur musobaqada Qarshining “Nasaf” klubi akademiyasi vakillari ishtirok etishadi. Xabaringiz bor, “Nasaf” akademiyasi 2017 yil yakuniga ko‘ra O‘zbekistonning eng yaxshi akademiyasi sifatida e’tirof etilgandi. Musobaqa joriy yilning 1-5 aprel kunlari o‘tkaziladi.

Har bir yosh toifasida 16 nafardan futbolchini musobaqaga olib borish mumkin. Akademiya tarbiyalanuvchilarining Qatardagi musobaqaga borish-kelish xarajatlarining barchasi Qatar futbol Assosiasiyasi tomonidan qoplanadi.