AGMK futbol jamoasi yangi mavsum boshlanishi oldidan o‘z safiga qo‘shib olgan futbolchilarni jamoatchilikka tanishtirdi. Marosimda klub bosh murabbiyi Viktor Kumikov, klub rahbariyati va futbolchilar ishtirok etishdi. Tadbir davomida ular mavsumoldi yig‘inlarining natijalari hamda yangi mavsumda qo‘yilgan rejalari bilan o‘rtoqlashishdi. Marosimning ikkinchi qismida jamoaning yangi formasi ham namoyish etildi. Ushbu mavsumda futbolchilar maydonga qora va sariq ranglarda chiqishadi.
Klubning nafaqat formasida, balki tarkibda ham katta o‘zgarishlar ro‘y berdi. Jamoaga 10 nafar yangi o‘yinchi qo‘shib olindi. Ulardan 4 nafari legionerlar – darvozabon Pavel Matyash, xujumchi Vadim Chemirtan, himoyachi Vladimir Bubanya va yarim himoyachi Yovan Jokich, hamda O‘zbekistonning boshqa klublaridan – xujumchi Abdumalik Abdullayev, yarim himoyachilar Otabek Zokirov, Muzaffarjon Muzaffarov, Ibroxim Numonov va himoyachilar Kaxramon Baxodirov va Javlon Guseynovlar.
