Slovakiya terma jamoasi himoyachisi Martin Shkrtel Tailandga qarshi o‘rtoqlik o‘yinida hushini yo‘qotib qo‘ydi.
33 yoshli himoyachi o‘yin epizodlaridan birida raqib zarbasini yuzi bilan qaytardi va maydonga to‘satdan yiqilib tushdi. Shundan so‘ng biroz vaqtga hushini ham yo‘qotdi.
Martinning jamoadoshlari uning tili orqaga ketib qolmasligi uchun tezkorlik bilan yordam berishdi.
Jamoadoshlarining say-harakatlari evaziga futbolchi o‘ziga kelib, o‘yinning qolgan daqiqalarini davom ettirdi.
Eslatib o‘tamiz, avvalroq Xitoyning “Dalyan Ifan” klubi yarim himoyachisi Nikolas Gaytan “Beyszin Guoan”ga qarshi mahalliy chempionat o‘yinida hushini yo‘qotib qo‘ygandi.
Kecha, 25 mart kuni esa Xorvatiyaning “Marsoniya” klubi yarim himoyachisi 25 yoshli Bruno Boban yengil zarbadan so‘ng o‘ziga kela olmasdan hayot bilan vidolashgandi.
