1986 yilda Argentina terma jamoasi safida jahon chempionligiga erishgan Pedro Pablo Paskullining fikriga ko‘ra, milliy terma jamoa hozir Messiga haddan ortiq bog‘lanib qolgan.
Argentina oxirgi o‘rtoqlik uchrashuvida Ispaniyaga 1:6 hisobida mag‘lub bo‘ldi.
"Hozir Argentina, biz 1986 yilda Maradonaga bog‘lanib qolganimizdan o‘n barobar ortiq Messiga bog‘lanib qolgan. Messi esa hamma muammolarni hal qila olmaydi. Yarimhimoya va hujumda hal qilar, ammo himoyada-chi? Bu natija Messi uchun muammo bo‘ladi, chunki hammasini undan so‘raydilar.
Men Argentinaning jahon chempioni bo‘lishini juda istayman. Ammo shunday mag‘lubiyatdan so‘ng Sampaolini xotirjam ko‘rdim, bu tashvishlanarli. Biz Argentinamiz, Peru emas. Bizda dunyoning eng zo‘r o‘yinchisi o‘ynaydi. Bizga jahon chempioni bo‘lishni istaydigan o‘yinchilar kerak", - deydi Paskulli.
