Xabaringiz bor, o‘tgan yilning 17 oktyabr kuni O‘zbekiston futbol Assosiasiyasining birinchi vise-prezidenti Umid Ahmadjonov Qatar futbol Uyushmasining prezidenti Shayx Hamad bin Xalifa Ahmad ol Taniyning taklifiga ko‘ra Dohaga xizmat safari uyushtirib, Qatar futboli mansabdor shaxslari bilan uchrashgandi.

Uchrashuv chog‘ida tomonlar O‘zbekiston va Qatar futbolini yanada rivojlantirish uchun hamkorlik aloqalarini kuchaytirish yo‘lida memorandum imzolagandilar. Shuningdek, Umid Ahmadjonov Qatardagi dunyoga mashhur “Aspire” akademiyasiga tashrif buyurib, u yerdagi sharoitlar bilan tanishgan holda, O‘zbekistonda ham ana shu tajribani yo‘lga qo‘yish borasidagi hamkorlik masalasida kelishuvga erishgandi.

Qatarning dunyoga mashhur “Aspire” jamoasi Osiyoning eng yaxshi akademiyalari tarbiyalanuvchilari ishtirokida tashkil etayotgan musobaqaga, ikki mamlakat futbol assosiasiyalari o‘rtasidagi memorandumga asosan O‘zbekistondan ham futbolchilarni taklif etdi.

2017 yil yakuniga ko‘ra O‘zbekistonning eng yaxshi akademiyasi sifatida e’tirof etilgan “Nasaf” futbol maktabining bir emas uchta yosh toifasidagi guruhlari Qatarga yetib borishdi. Ularni Qatarning Doha shahrida mezbonlar iliq kutib olishdi. Yosh futbolchilarimiz Doha shahridagi besh yulduzli “TORCH” mehmonxonasiga joylashib, “Aspire” akademiyasida mashg‘ulot o‘tkazishga ham ulgurishdi. 

Xalqaro turnirda ishtirok etadigan "Nasaf" akademiyasi vakillari - Nurali Sultonov va Nasim Shoyimov murabbiyligidagi 2000 yilda tug‘ilganlar, Pavel Kshnyakin ustozligidagi 2001-2002 yilda tug‘ilganlar hamda Umar Rahmatullayev va Jasur Ibrohimov bosh murabbiylik qilayotgan 2003 yilda tavallud topgan futbolchilar. Jamoalarning har biri 16 nafar yosh futbolchilardan iborat. Shuningdek, darvozabonlar murabbiyi Mixail Naumov hamda shifokor Sunnat Saxaddinovlar qarshilik futbolchilarga hamkorlik qilishmoqda.

Qatardagi musobaqa 4 aprelga qadar davom etadi. Har bir yosh toifasidagi jamoalar ikkitadan uchrashuv o‘tkazishadi. Shuningdek, jamoalari qatarlik tengdoshlari bilan bittadan o‘rtoqlik uchrashuvlarida ham maydonga tushishadi.

Delegasiyaga “Nasaf” futbol maktabi direktori Sergey Kucherenko rahbarlik qilmoqda.