“Nasaf” – “Persepolis” uchrashuvi yakuniga yetgach, o‘yin yakunlariga bag‘ishlangan  matbuot anjumani bo‘lib o‘tdi. Matbuot anjumanining dastlabki qismida “Persepolis” jamoasi bosh murabbiyi Branko Ivankovich ishtirok etdi.

- Assalomu alaykum, bugun juda chiroyli o‘yin bo‘ldi. “O‘yinda qo‘lga kiritilgan natijadan mamnunman. Biz ushbu o‘yindan so‘ng keyingi bosqich masalasini hal qilib qo‘ydik. Bu esa bizning asosiy maqsadimiz edi.

O‘yinga to‘xtaladigan bo‘lsam, juda shiddatli futbol uchrashuviga guvoh bo‘ldik. “Nasaf” keyingi bosqichga chiqa olmadi. Bugun gol kirita olmagan bo‘lsada, juda ajoyib o‘yin ko‘rsata oldi.

Shu o‘rinda mezbonlarga, bizga ko‘rsatgan ehtiromi va yaratib bergan sharoitlari uchun o‘z minnatdorchiligimni bildiraman

Biz chempionlar ligasining eng qiyin guruhidan joy olganmiz. Shuni ta’kidlash kerakki, bugun biz Osiyoning istalgan jamoasiga qarshi sifatli o‘yin namoyish eta olishimizni ko‘rsata oldik.

Bugungi o‘yindan keyin jamoamizda ishonch paydo bo‘ldi. Keyingi o‘yinda ham “Al Sadd”ni mag‘lub etgan xolda guruhda birinchi o‘rinni olish va bosqichma- bosqich ijobiy natija ko‘rsatishga harakat qilamiz.

Bugun “Nasaf” juda ham yuqori kayfiyatda o‘ynadi, 90 daqiqa davomida gol urishga harakat qildi va jamoamizga o‘z o‘yinini namoyish qilishga imkon bermadi. “Nasaf”ga Dragan Cheranning jarohati xalal berdi, ammo bu jamoani yorqin kelajak kutmoqda. Tarkibida iqtidorli yoshlar ko‘p.

“Nasaf”dagi 20 va 10-raqamdagi futbolchilar menga yoqdi. 6 va 7-raqamdagi futbolchilarda ham mahorat yuqori. Shuningdek Lukich o‘ng qanotdan ko‘p hujumlar orqali bizga “bosh og‘riq” bo‘ldi. Ta’kidlayman, “Nasaf" bugun birinchi o‘yindan butkul boshqacha raqobat ko‘rsatdi. Ilk o‘yinimizda mamlakatiingizda  chempionat boshlanmagani “Nasaf”ga pand bergan edi.