AGMK –“Qo‘qon-1912” uchrashuvidan keyin o‘tkazilgan matbuot anjumanining birinchi qismida jamoamiz ustozi No‘’mon Hasanov va jamoamiz sardori Nosir Otaqo‘ziyevlar ishtirok etishdi.

No‘’mon Hasanov: - Superligadagi har bir o‘yin og‘ir bo‘ladi. Buni hammamiz yaxshi tushunib turibmiz.

Jumladan, bugungi bahs ham bundan mustasno emas. Kurashlarga boy o‘yin bo‘ldi. Bugun raqibga nisbatan bizga qiyinroq edi, chunki biz safardagi beshinchi o‘yinni o‘tkazdik. Bugun yo‘qotishlarimiz bor edi.

Bahodir Pardayev va Murod Xolmuhammedovlar o‘yinni o‘tkazib yuborishdi. Shogirdlarimdan ko‘proq bir-birlariga qisqa pas berishlarini so‘ragan edim. Birinchi bo‘limning 25 daqiqasida men kutgan o‘yinni namoyish eta olishdi.

Keyin esa biroz boshqacha to‘p surishdi. Futbolchilarimizni ham to‘g‘ri tushunaman. Oltita o‘yinning beshtasini safarda o‘tkazish oson emas. Shunday bo‘lsa-da, sakkiz ochko olishga erishdik. Bu yomon natija emas. AGMKda ham yaxshi imkoniyatlar bo‘ldi. Bugun omadimiz keldi. Safardan bir ochko bilan qaytish bu yaxshi natija.

Bugun bizni qo‘llab-quvvatlagani Qo‘qondan ko‘plab muxlislar tashrif buyurishdi. Buning uchun ularga minnatdorchilik bildiraman. AGMKga keyingi o‘yinlarda omad tilayman.

Nosir Otaqo‘ziyev: Chindan ham bugungi bahs ancha og‘ir kechdi. AGMK yaxshi shakllangan jamoa ekanligini bilardik. Shunga yarasha tayyorgarlik ko‘rdik. Mehnatlarimiz zoye ketmadi. AGMKga keyingi bahslarda omad tilab qolaman.