Kecha Ispaniyaning Barselona shahrida baydarka va kanoeda eshkak eshish buyicha bo‘lib o‘tayotgan o‘smirlar o‘rtasidagi jahon chempionatida hamyurtimiz Islom Abdusalomov sprint va slalom buyicha o‘tkazilgan bellashuvlar yakuniga ko‘ra jahonda ikkinchi o‘rinni egallab, Argentinadagi III yozgi o‘smirlar Olimpiya o‘yinlariga yo‘llanma olganligi haqida xabar qilgandik.

Shuningdek, qizlar o‘rtasida sprint va slalom bahslarida ishtirok etayotgan Gulbahor Fayziyeva ham sprintdan so‘ng birinchi pog‘onani egallab turganligi ma’lum qilingandi.

Bugun mazkur bellashuvlarning slalom bahslari tashkil qilindi. Quvonarlisi, vakilamiz ushbu yo‘nalishda ham eng yaxshi natija qayd eta oldi va o‘z tengdoshlari orasida jahonda tengsiz deb topilib, delegasiyamiz hisobiga Olimpiya o‘yinlarining yana bir lisenziyasini qo‘shib qo‘ydi. Demak, Buenos-Ayresdagi o‘smirlar Olimpiya o‘yinlariga akademik eshkak eshish xamda baydarka va kanoeda eshkak eshish buyicha o‘zbekistonlik sportchilar har ikkala yunalishda ikkitadan yo‘llanmaga ega bo‘lishdi.

Ma’lumot uchun, bugungi kunga qadar hamyurtlarimiz quyidagi sport turlarida III yozgi o‘smirlar Olimpiya o‘yinlari lisenziyasiga ega bo‘lib ulgurishdi:

Og‘ir atletika - 3 ta

Akademik eshkak eshish - 2 ta

Ot sporti (konkur) - 1 ta

Taekvondo - 1 ta

Baydarka va kanoeda eshkak eshish  - 2 ta

Eslatib o‘tamiz, III o‘smirlar Olimpiya o‘yinlari joriy yilning 6-18 oktyabr kunlari Argentina poytaxti Buenos–Ayresda bo‘lib o‘tadi.