Кеча Испаниянинг Барселона шаҳрида байдарка ва каноэда эшкак эшиш буйича бўлиб ўтаётган ўсмирлар ўртасидаги жаҳон чемпионатида ҳамюртимиз Ислом Абдусаломов спринт ва слалом буйича ўтказилган беллашувлар якунига кўра жаҳонда иккинчи ўринни эгаллаб, Аргентинадаги III ёзги ўсмирлар Олимпия ўйинларига йўлланма олганлиги ҳақида хабар қилгандик.
Шунингдек, қизлар ўртасида спринт ва слалом баҳсларида иштирок этаётган Гулбаҳор Файзиева ҳам спринтдан сўнг биринчи поғонани эгаллаб турганлиги маълум қилинганди.
Бугун мазкур беллашувларнинг слалом баҳслари ташкил қилинди. Қувонарлиси, вакиламиз ушбу йўналишда ҳам энг яхши натижа қайд эта олди ва ўз тенгдошлари орасида жаҳонда тенгсиз деб топилиб, делегациямиз ҳисобига Олимпия ўйинларининг яна бир лицензиясини қўшиб қўйди. Демак, Буэнос-Айресдаги ўсмирлар Олимпия ўйинларига академик эшкак эшиш хамда байдарка ва каноэда эшкак эшиш буйича ўзбекистонлик спортчилар ҳар иккала йуналишда иккитадан йўлланмага эга бўлишди.
Маълумот учун, бугунги кунга қадар ҳамюртларимиз қуйидаги спорт турларида III ёзги ўсмирлар Олимпия ўйинлари лицензиясига эга бўлиб улгуришди:
Оғир атлетика - 3 та
Академик эшкак эшиш - 2 та
От спорти (конкур) - 1 та
Таэквондо - 1 та
Байдарка ва каноэда эшкак эшиш - 2 та
Эслатиб ўтамиз, III ўсмирлар Олимпия ўйинлари жорий йилнинг 6-18 октябрь кунлари Аргентина пойтахти Буэнос–Айресда бўлиб ўтади.
