“Navbahor” – “Bunyodkor” uchrashuvidan keyingi matbuot anjumanining birinchi qismida “qaldirg‘ochlar” vakillari ishtirok etishdi.

- Uchrashuv chiroyli va shiddatli o‘tdi. “Navbahor” jamoasini g‘alaba bilan tabriklayman. Avval ham aytganman, hozir ham aytaman – Namanganda har qanday jamoa oson o‘yin o‘tkazmagan. Xatto Braziliya terma jamoasi “Navbahor” mehmoni bo‘lsa ham ularga oson bo‘lmaydi. Mavsumdagi birinchi mag‘lubiyat. Juda alamli mag‘lubiyat. Hayot davom etadi. Bu kabi mag‘lubiyatlar bizni yanada kuchliroq qiladi, deb o‘ylayman. Bugungi o‘yin uchun shogirdlarimdan minnatdorman.

Yechinish xonasiga kirib, har bir shogirdimni qo‘lini siqib, ularga rahmat dedim. Rostdan ham, yomon o‘ynamadik. “Navbahor”ning g‘alaba qozonganining asosiy omili sifatida ularning 12-o‘yinchilari, ya’ni muxlislarini aytgan bo‘lardim. Bunday bosim ostida o‘ynagan har bir jamoa qiynaladi. Nima bo‘lganda ham hakam xushtagin chalinmaguncha o‘yinni bo‘shashtirish kerak emas, - deydi Mirjalol Qo‘shoqovich.

- “Navbahor”ga qarshi safar o‘yini og‘ir o‘tishini bilardim. Shunga mos ravishda jiddiy tayyorgarlik ko‘rdik. O‘yinni yomon o‘tkazmadik. Afsuski, alamli mag‘lubiyatga uchradik. Keyingi uchrashuvlarni o‘ylagan holda tayyorgarligimizni kuchaytirishimiz kerak, - deydi “Bunyodkor” safida uchrashuvning eng yaxshi futbolchisi, deb topilgan Sardor Sobirxo‘jayev.