Superliga uchrashuvlarini tomosha qilish uchun stadionlarga tashrif buyurayotgan muxlislarga yanada ko‘proq qulayliklar yaratish bo‘yicha O‘FA va PFL rahbariyati tomonidan klublarga qat’iy topshiriq berilgan bo‘lib, Superliga jamoalari bu topshiriqlarni bajarish uchun bir qator chora-tadbirlarni amalga oshirishayotgani haqida avval xabar berib o‘tgandik.

Jumladan, “Buxoro” stadionida ham muxlislar uchun bir qator yangiliklar yo‘lga qo‘yildi. Kecha Superliganing 8-turidan o‘rin olgan “Buxoro” – “Qizilqum” uchrashuvini tomosha qilish uchun kelgan muxlislar stadionda yaratilgan qo‘shimcha qulayliklarni ko‘rib, ancha quvonishdi.

Stadionda klub liboslari, atributikalari savdosini amalga oshiradigan do‘kon ish boshladi, jajji bolakaylar uchun turli attraksionlar o‘rnatildi, uchrashuv boshlanishidan avval muxlislar o‘rtasida turli sovrinli o‘yinlar o‘tkazildi.

Shuningdek, “Buxoro” – “Qizilqum” o‘yinining birinchi bo‘limi yakuniga yetganidan keyin imkoniyati cheklangan muxlislar va jajji bolakaylarga futbolchilar imzosi tushirilgan to‘plar taqdim qilindi.

O‘yindan so‘ng esa tribunalarda o‘tirgan muxlislarga ham futbolchilar tomonidan to‘plar sovg‘a qilindi.

Bu kabi chora-tadbirlar Superliga uchrashuvlarini tomosha qilish uchun stadionlarga kelayotgan muxlislar oqimini yanada oshirishi shubhasiz.