Xabaringiz bor, Superliga bahslarini omadsiz o‘tkazayotgan «Neftchi» O‘zbekiston kubogi nimchorak final bosqichiga chiqdi. Farg‘onalik futbolchilar 1|16 final bosqichini G‘uzorda Pro-liga vakili hisoblangan «Sho‘rtan» jamoasiga qarshi o‘tkazib, 2:0 hisobida zafar quchishdi.
O‘yinning ikkinchi bo‘limida Avazbek O‘lmasaliyev va Murod Bobojonov tomonidan urilgan ikki gol «Neftchi»ning keyingi raundga chiqishini ta’minladi. Lekin vodiyliklarning chempionatdagi ishlari yurishmayapti.
«Neftchi» ortda qolgan o‘yinlarda ikki ochko jamg‘arib, turnir jadvalining so‘nggi pog‘onasida bormoqda. Biz «Neftchi» sardori Shukurali Po‘latovdan intervyu oldik.
- Shukurali, «Neftchi» mamlakat kubogining navbatdagi bosqichiga yo‘l oldi. G‘uzordagi o‘yinda ikki to‘p farqi bilan g‘alaba qozondinglar. «Sho‘rtan» sizlarga munosib qarshilik ko‘rsata olmadimi yoki «Neftchi» o‘sha kuni raqibiga nisbatan kuchliroq edimi?
- «Sho‘rtan»ga qarshi o‘yin biz uchun ancha qiyin va murakkab kechdi. Mezbonlar qarshi hujum taktikasi asosida harakat qilishdi va bu holat bizga yetarlicha tashvish tug‘dirdi. Murabbiylarimiz bizdan talab qilgan o‘yinni ko‘rsata olganimiz uchun ham g‘alabaga erishdik, deb o‘ylayman. Shu kuni jamoamizning barcha chizig‘i yaxshi o‘ynadi.
- Klub rahbariyati «Neftchi» oldiga kubok bahslarida ham aniq maqsad qo‘yganmi?
- O‘zbekiston kubogida ham imkon qadar uzoqroqqa yetib borishimiz kerak. Umuman olganda, biz har bir uchrashuvda maydonga g‘alaba ilinjida tushamiz.
Muxlislarimizni xushnud etishga astoydil intilyapmiz. Lekin qayerdadir omad kelmayapti, ba’zi o‘yinlarda raqib kuchlilik qilmoqda. O‘ylaymanki, jamoamiz turdan-turga shakllanib boryapti.
- Jamoa Superligada omadsiz ishtirok etyapti. Buning sabablari nimada? «Neftchi» muxlislari buni vaqtinchalik holat sifatida qabul qilsalar bo‘ladimi?
- Albatta, vaqtinchalik holat. Jamoamiz omadsizlikdan chiqib ketish uchun harakat qilyapti. Futbolchilar mashg‘ulotlarda katta ishtiyoq bilan ishlashmoqda. Ishonamanki, «Neftchi»ning ijobiy natija bilan yakunlanadigan o‘yinlari hali oldinda.
- Menimcha, tarkib yomon emas. Nima yetishmayapti, deb o‘ylaysiz?
- Jamoa mavsum boshlanishiga juda oz vaqt qolganda to‘plandi. Fikrimcha, omadsiz ishtirokka asosiy sabab shu holat bo‘lsa kerak. Chunki murabbiylar o‘quv-mashg‘ulot yig‘inini o‘zlari xohlagandek o‘tkaza olishmadi, seleksiya ishlarini amalga oshirisholmadi.
- Jamoangiz chempionat doirasidagi hozircha so‘nggisi bo‘lib turgan o‘z maydonidagi uchrashuvda «Buxoro»ga imkoniyatni boy berdi. «Neftchi» o‘sha o‘yinda mag‘lubiyatga loyiqmidi?
- Bu uchrashuvni bevosita stadiondan va televizordan tomosha qilganlar shunga guvoh bo‘lishdiki, «Neftchi» shu kuni mag‘lubiyatga loyiq emasdi. Biz hujumkor va mazmunli futbol namoyish etgandik.
Lekin yakuniy zarbalarni berishda xatoliklarga yo‘l qo‘ydik. Bu - futbol, unda kimdir yutadi, kimdir yutqazadi.
- O‘tgan mavsum «Qizilqum» jamoasida to‘p surdingiz. Bu yil esa «Neftchi» sharafini himoya qilyapsiz. Navoiydan ketishingizga yetarlicha sabablar bormidi?
- Ha, buning o‘ziga yarasha sabablari bor edi. Lekin buni hozir oshkor qilmoqchi emasman. Shuni aniq bilamanki, «Qizilqum» yaxshi jamoa. O‘sha payt klubdan ketishim kerak edi va o‘ylashimcha, to‘g‘ri qarorga keldim.
- «Qizilqum»dagi maoshlaringizning hammasini oldingizmi? Klub sizdan qarz bo‘lib qolmadimi?
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
