Ispaniya La ligasining 35-turi doirasida "Real" o‘z maydonida "Leganes"ni qabul qildi va qiyinchilik bilan g‘alaba qozondi.

Uchrashuvning 9-daqiqasidayoq Zidan shogirdlari hisobni ochishga muvaffaq bo‘lishdi. Benzemaning uzatmasidan so‘ng Garet Beyl chalqancha uslubda darvozani ishg‘ol qildi.

Shundan so‘ng mezbonlar ikkita qulay imkoniyatdan foydalana olmagan bo‘lsalar, bir vaziyatda omad aynan "Qirollik klubi" tomonida bo‘ldi. Amrabat 16 metrlardan yo‘llagan zarba natijasida to‘p to‘singa tegdi. Birinchi bo‘limning so‘nggi daqiqasida esa Mayoral o‘z imkoniyatidan foydalanib, hisobni 2:0ga yetkazdi.

Ikkinchi bo‘lim boshida Kazemironing zarbasini raqib darvozaboni chiziq ustida bir amallab qaytarib qolmaganida o‘yin taqdiri hal bo‘lardi. Bo‘lim o‘rtalarida esa Amrabat o‘ng qanotdan yetkazgan uzatmani Brashanas darvozaga joylab qo‘ydi — 2:1.

Shundan keyin "Leganes" ko‘proq hujum uyushtirdi. "Real" posboni Kiko Kasilya bir necha marta o‘z darvozasini goldan saqlab qoldi.

Mazkur g‘alabadan keyin "Real" o‘z ochkolarini 71taga yetkazib oldi va jamoa "Atletiko"dan 1 ochko ortda qolmoqda.

Ispaniya La ligasi, 35-tur
"REAL MADRID" - "LEGANES" 2:1 (2:0)
Gollar: 1:0 – 8 Beyl, 2:0 – 45 Mayoral, 2:1 – 66 Brashanas.
Real Madrid – Kasilya, Valyexo, Teo, Xakimi, Sebalyos, Lyorente, Kovachich (Kroos, 62), Kazemiro, Beyl, Mayoral, Benzema (Asensio, 62).
Leganes – Kuelyar, Bustinsa, Riko, Saldua, Siovas, Brashanas (Naranxo, 90), Peres, Pires, El-Jar, Amrabat (Eraso, 90), Gerrero (Bovyu, 62).
Ogohlantirish: Saldua (73).
Chetlatish: Pires (90+3).