«Dinamo» - «Xorazm» uchrashuvidan keyin Samarqand klubi yangi bosh murabbiyi Davron Fayziyev debyuti va o‘yin borasidagi fikrlarini bildirdi.

«Ikki kun oldin «Dinamo» klubi rahbariyati taklif bilan chiqishganida, o‘ylab ko‘rish uchun vaqt olgandim. Sababi, jamoada tajribali va malakali mutaxassislar ishlayotgandilar. Hozirdan aytishim kerak, men jamoaga birovni o‘rnini olish uchun emas, imkonqadar yordam berish uchun keldim. Barchamiz birgalashib maqsad sari harakat qilamiz. Bugun jamoaga kelganim uchun, hali mashg‘ulot o‘tkazishga ham, jamoani to‘liq o‘rganishga ham ulgurmadim. Jamoa o‘yinini ilk bor kuzatib, baho berish qiyin bo‘lsada, barcha singari futbolchilarning bugungi harakatidan ham, natijadan ham qoniqmadim. O‘yin nazorati to‘liq «Dinamo»da bo‘lsada, «Xorazm» bitta vaziyatidan gol urib, o‘yin yakunigacha himoyalandi va ochkoni qo‘lga kiritdi. Superligani maqsad qilgan ekanmiz, bunday bahslarda 3 ochko olishimiz shart. Qolaversa, bugun jamoada ishtiyoq ham kuchli emasdek ko‘rindi. Qator golli vaziyatlardan ham foydalana olmadik. Ertadan jamoa bilan to‘liq ishga kirishib, vaziyatni o‘nglashga intilamiz» - deydi «Dinamo» yangi bosh murabbiyi Davron Fayziyev.