O‘zbekiston futbol assosiasiyasi tomonidan O‘zbekistonda futbol hakamlari malakasini yanada oshirish va yosh hakamlarni tanlab olib, ularni tajribali hakamlar saviyasiga olib chiqish borasida bir qator chora-tadbirlar amalga oshirilmoqda.
Jumladan, O‘zbekiston Respublikasi Prezidenti Shavkat Mirziyoyevning 2018 yil 16 martdagi PQ-3610-sonli “Futbolni yanada rivojlantirish chora-tadbirlari to‘g‘risida”gi qaroriga asosan Murabbiylar va hakamlarni tayyorlash Respublika maktabi faoliyati tugatilib, bu vakolatlar O‘zbekiston futbol assosiasiyasi qoshiga o‘tkazildi. Ushbu yo‘nalish bo‘yicha hakamlarni tanlab olish va tayyorlash mezonlari ishlab chiqildi. Ana shu mezonlar asosida yosh hakamlarni tanlab olish ishlari Respublikamiz viloyatlarini 4ta hududga bo‘lgan holda olib borilyapti.
1-hudud: Qoraqalpog‘iston Respublikasi, Xorazm, Buxoro
2-hudud: Surxondaryo, Qashqadaryo, Navoiy, Samarqand
3-hudud: Namangan, Farg‘ona, Andijon
4-hudud: Toshkent shahri, Toshkent viloyati, Sirdaryo, Jizzax
Shunga asosan aprel oyida Namangan viloyatida yosh hakamlarni tanlab olish bo‘yicha dastlabki seminar-tanlov o‘tkazildi. 24 aprel kuni Buxoro shahrida Buxoro va navoiylik yosh hakamlar uchun, 1 may kuni esa Toshkent shahrida seminar bo‘lib o‘tdi.
Keyingi seminar 3 may kuni Xorazmda Qoraqalpog‘iston Respublikasi va xorazmlik hakamlar uchun o‘tkaziladi.
Shuningdek, 3 may kuni vodiylik hakamlar uchun Farg‘onada seminarning ikkinchi bosqichi bo‘lib o‘tadi.
Ushbu hududlardan saralab olingan yosh hakamlar shu yilning oktyabr oyida Toshkentda o‘tkaziladigan seminar-tanlovda qatnashib, kelajakda hakamlik faoliyati bilan professional tarzda shug‘ullanish imkoniyatini qo‘lga kiritishlari mumkin.
Hakamlik faoliyati bilan shug‘ullanish istagida bo‘lgan 18-32 yoshdagi erkaklar va 20-25 yoshdagi ayollar mahalliy futbol federasiyalariga murojaat qilishlari va seminar-tanlovlarda ishtirok etishlari mumkin.
