Pepsi Superliga 12-turi doirasidagi “Navbahor” – “Metallurg” uchrashuvidan keyingi matbuot anjumanida “lochinlar” bosh murabbiyi Ilhom Mo‘minjonov va hujumchi Azamat Allaniyozov ishtirok etib, OAV xodimlarining savollariga javob berishdi.
“Uch kun oldin uchrashuv o‘tkazishgani bois, bugungi o‘yinda shogirdlarimda charchoq alomatlari bor edi. Ikkinchi bo‘limda yigitlarga shunga bog‘liq ko‘rsatma berdik va ular shunga amal qilib, yirik hisobda g‘alaba qozonishdi. Bundan xursandmiz. Bugungi bahs taqdirini zaxiradan maydonga tushgan futbolchilar hal qilishdi. Ayniqsa, shogirdim Azamat Allaniyozovni ajoyib o‘yin va “xet-trik” bilan tabriklayman.
“Metallurg” futbolchilari bizga qaraganda ko‘proq dam olishdi. Shuning uchun bugun 2ta bo‘limda ikki xil o‘yin guvohiga aylandik. Tanaffusdan keyin shogirdalarim o‘z irodalarini namoyish etib, yirik hisobdagi g‘alabani tantana qilishdi.
Hujumkor futbol namoyish etish borasida to‘xtaladigan bo‘lsam, biz raqibga qarab, taktika tanlaymiz. Bugungi bahsning ikkinchi bo‘limida hujumkor futbol namoyish etgandik, buning natijasida yirik hisobda zafar quchdik”, - deydi Mo‘minjonov.
Azamat Allaniyozov:”Avvalo bugungi g‘alaba bilan barcha namanganlik muxlislarni tabriklayman. Murabbiylarimizning ko‘rsatmalarini maydonda to‘liq bajarib, g‘alaba qozonishga muvaffaq bo‘ldik. Bundan xursandmiz. Maydonga bugun o‘zgacha ishtiyoqda tushgandim va gol urishimni sezgandim. Asoosiysi, jamoamizga ko‘proq foyda keltirsam bo‘ldi.
Uchrashuvning ilk daqiqalaridan maydonda harakatlanganimda, nechta to‘p kiritgan bo‘lardim, bilmadimu, lekin gol urishim aniq edi”, - deydi Allaniyozov.
