“Metallurg” jamoasi ustozi Andrey Shipilov “Lokomotiv”ga qarshi uchrashuvdan so‘ng jurnalistlarning qiziqtirgan savollariga javob qaytardi.

Andrey Shipilov, “Metallurg” PFK bosh murabbiyi: - O‘in juda og‘ir bo‘ldi. “Lokomotiv” juda kuchli va tajribali o‘yinchilarni jamlagan jamoa. Bunday raqibga qarshi butun o‘yin davomida kuchli bosim ostida harakat qilmasang muvaffaqiyatga erishishing qiyin. O‘zinglar ko‘rdingiz, bizda vaziyatlar yetarli bo‘ldi, ammo ularning ko‘pidan foydalana olmadik. Menga birinchi bo‘limga qaraganda ikkinchi taymdagi o‘yinimiz ko‘proq yoqdi. Ikkinchi taymda futbolchilar o‘zlaridagi bosimni yenga olishdi va ko‘rsatmalarni aniq, to‘g‘ri bajarishdi. Xursandman, o‘yinimizdan ham, qayd etilgan natijadan ham. Birinchi davrada, safarda qayd etgan natijamiz tasodifiy emasligini isbotladik.

Endi futbolchilarga qisqa muddatli ta’til beramiz. Boisi taqvimdagi o‘zgarish bois keyingi o‘yinimizga qadar vaqt yetarli. Shu oyning oxirgi sanasida to‘planib, boshqa grand jamoalarimizga qarshi o‘yinlarga tayyorgarlikni boshlab yuboramiz, deydi Andrey Sergeevich.

“Metallurg” tarkibida uchrashuvning eng yaxshi o‘yinchisi deb qayd etilgan Zohid Abdullayevning fikrlarini ham bilishga qiziqdik.

-  Bugun o‘yin juda og‘ir kechdi, o‘zingiz ko‘rdingiz. Bizda bosim bor edi. Ketma ket ikkita uchrashuvni yutqazgandik. Bolalarning barchasiga katta rahmat. G‘alaba uchun borlarini berganligi uchun. Nima deyish mumkin, bugun eng yaxshi o‘yinlarimizdan birini namoyish etdik. Men uchun muhimi tug‘ilgan kunimda gol kiritish emas, jamoamizning yutug‘idir. Barcha ishqibozlarimizni yutuq bilan tabriylayman va ularga qo‘llab quvvatlayotganliklari uchun minnatdorchilik bildiraman, deydi Zohid Abdullayev.