Hozirgi kunda ichki chempionatimiz islohotlardan so‘ng ancha qiziqarliroq bo‘lib qolgan edi. Tomoshaboplik borasida televizor atrofida ham ancha-muncha muxlislarni yig‘a olyapti. Viloyatlarda esa har o‘yinda tumonat odam. Hatto Toshkentning “Bunyodkor” jamoasi ham o‘z muxlislarini stadionga qaytarishga muvaffaq bo‘la oldi. Lekin xalqimizning kimsan «Paxtakor»dek bayroqdor jamoasi bu borada biroz oqsayapti.

Futbolimiz olamida «Paxtakor»ga nisbatan qandaydir noroziliklar uyg‘otib ketgan shaxslar tufayli mamlakatimizning bosh jamoasi hozir deyarli muxlissiz qoldi. To‘g‘ri, fan-klub a’zolari muxlislar bilan ishlashda ancha katta hajmdagi ishlarni amalga oshirmoqda. Lekin, ammo, biroq... Hatto ismini ham tilga olishni xohlamaydigan insonlar kasriga oltin tarixga ega jamoamiz el nazaridan qoldi. Avvallari «Paxtakor»ning viloyat jamoalari bilan mehmondagi o‘yinlarida stadiondagi anshlagni bir eslang! Hatto bir muxlisning o‘yindan so‘ng Leonid Koshelevga gul uzatganini o‘z ko‘zim bilan ko‘rganman. Qizig‘-a, nimalar o‘zgarib ketmadiya.

Hozirda ijtimoiy tarmoqlarda ham «Paxtakor»ga nisbatan qandaydir yoqimsiz fikrlar hamon uchrab turibdi. To‘g‘ri, jamoa rulini Arveladze qo‘lga olgach, sherlar biroz o‘zlarini o‘nglab olishdi. Lekin avvalgi «Paxtakor» hech bo‘lmasa Tajmurod Agamurodovning «Paxtakor»i darajasiga chiqishiga ham xali ancha bordek go‘yo, yana bilmadim! Ichki chempionatimizda «Bunyodkor» paydo bo‘lgach «Paxtakor»ning bir necha o‘yinchilari «Bunyodkor»ga o‘tib ketishdi. O‘sha paytlari esingizda bo‘lsa Toshkent derbilari juda murosasiz kechardi. Lekin qizig‘i shundaki, aksariyat muxlislar «Paxtakor»ga muxlislik qilishardi... Bu jamoalarning ohirgi o‘yinlarida shuni kuzatyapman. Deyarli 70% muxlislar endilikda «Bunyodkor»ga muxlislik qilishmoqda!

Lekin shuni ta’kidlash joizki, «Paxtakor» hozirda biroz o‘zini o‘nglab olmoqda. Ulardan faqat va faqat to‘xtamasdan ishlash talab etiladi. Halol g‘alabalar ketidan asta-sekinlik bilan avvalgi shon-shuhrat va muxlislar mehri ham qaytishi muqarrar!

Yahyoxo‘ja ULUG‘XO‘JAYEV