Ҳозирги кунда ички чемпионатимиз ислоҳотлардан сўнг анча қизиқарлироқ бўлиб қолган эди. Томошабоплик борасида телевизор атрофида ҳам анча-мунча мухлисларни йиға оляпти. Вилоятларда эса ҳар ўйинда тумонат одам. Ҳатто Тошкентнинг “Бунёдкор” жамоаси ҳам ўз мухлисларини стадионга қайтаришга муваффақ бўла олди. Лекин халқимизнинг кимсан «Пахтакор»дек байроқдор жамоаси бу борада бироз оқсаяпти.

Футболимиз оламида «Пахтакор»га нисбатан қандайдир норозиликлар уйғотиб кетган шахслар туфайли мамлакатимизнинг бош жамоаси ҳозир деярли мухлиссиз қолди. Тўғри, фан-клуб аъзолари мухлислар билан ишлашда анча катта ҳажмдаги ишларни амалга оширмоқда. Лекин, аммо, бироқ... Ҳатто исмини ҳам тилга олишни хоҳламайдиган инсонлар касрига олтин тарихга эга жамоамиз эл назаридан қолди. Авваллари «Пахтакор»нинг вилоят жамоалари билан меҳмондаги ўйинларида стадиондаги аншлагни бир эсланг! Ҳатто бир мухлиснинг ўйиндан сўнг Леонид Кошелевга гул узатганини ўз кўзим билан кўрганман. Қизиғ-а, нималар ўзгариб кетмадия.

Ҳозирда ижтимоий тармоқларда ҳам «Пахтакор»га нисбатан қандайдир ёқимсиз фикрлар ҳамон учраб турибди. Тўғри, жамоа рулини Арвеладзе қўлга олгач, шерлар бироз ўзларини ўнглаб олишди. Лекин аввалги «Пахтакор» ҳеч бўлмаса Тажмурод Агамуродовнинг «Пахтакор»и даражасига чиқишига ҳам хали анча бордек гўё, яна билмадим! Ички чемпионатимизда «Бунёдкор» пайдо бўлгач «Пахтакор»нинг бир неча ўйинчилари «Бунёдкор»га ўтиб кетишди. Ўша пайтлари эсингизда бўлса Тошкент дербилари жуда муросасиз кечарди. Лекин қизиғи шундаки, аксарият мухлислар «Пахтакор»га мухлислик қилишарди... Бу жамоаларнинг оҳирги ўйинларида шуни кузатяпман. Деярли 70% мухлислар эндиликда «Бунёдкор»га мухлислик қилишмоқда!

Лекин шуни таъкидлаш жоизки, «Пахтакор» ҳозирда бироз ўзини ўнглаб олмоқда. Улардан фақат ва фақат тўхтамасдан ишлаш талаб этилади. Ҳалол ғалабалар кетидан аста-секинлик билан аввалги шон-шуҳрат ва мухлислар меҳри ҳам қайтиши муқаррар!

Яҳёхўжа УЛУҒХЎЖАЕВ