Xabaringiz bor, Vyetnamning Xoshimin shahrida taekvondo WTF bo‘yicha Osiyo chempionati yakuniga yetdi. Ushbu qit’a birinchiligida o‘zbekistonlik sportchilar ham ishtirok etib, umumjamoa hisobida uchinchi o‘rinni egallagandilar.
Bugun, 29 may kuni musobaqada ishtirok etgan bir qator sportchilarimiz poytaxtimizga yetib kelishdi. Ularni Islom Karimov nomidagi Toshkent xalqaro aeroportida Milliy olimpiya qo‘mitasi mutasaddilari, O‘zbekiston taekvondo WTF assosiasiyasi rahbarlari, sportchilarning yaqinlari, muxlislar va ommaviy axborot vositalari xodimlari kutib olishdi.
Yurtimizga Osiyo chempionati sovrindorlarining uch nafari – Niyoz Po‘latov, Madina Mannopova va Sardor Toirovlar qaytib kelishdi. Terma jamoamizning qolgan yetakchi sportchilari esa 1-3 iyun kunlari bo‘lib o‘tadigan Gran-Pri turnirida ishtirok etish uchun Italiyaga jo‘nab ketishgan.
«Kattalar o‘rtasidagi Osiyo chempionatidan qaytib keldik. Ushbu musobaqada bronza medalini qo‘lga kiritdim. Bahslarda hindistonlik va xitoylik raqibini mag‘lubiyatga uchratdim. Final yo‘llanmasi uchun kechgan jangda esa vyetnamlik sportchiga kichik hisobda yutqazib qo‘ydim. Keyingi musobaqalarda endi oltin medalni qo‘lga kiritishga harakat qilaman. Ushbu yutuqni qo‘lga kiritishimda murabbiylarimning hissasi katta. Buning uchun ularga minnatdorchilik bildiraman», – dedi musobaqaning bronza medali sovridori Madina Mannopova.
Eslatib o‘tamiz, Osiyo chempionatida sovrindor bo‘lgan o‘zbekistonlik taekvondochilar ro‘yxati quyidagicha ko‘rinish olgan:
Oltin:
-74kg: Nikita Rafalovich
-67kg: Nigora Tursunqulova
Kumush:
-87kg: Jasur Boyqo‘ziyev
Bronza:
-80kg: Maksim Rafalovich
-63kg: Sardor Toirov
-46kg: Madina Mannopova
-58kg: Niyoz Pulatov
-87kg: Dmitriy Shokin.
