AGMK futbol klubi murabbiylar shtabida o‘zgarish amalga oshirildi. Bir yarim mavsum davomida jamoani boshqarib kelgan Viktor KUmkiov jamoa rahbariyatiga murojaat etib, amaldagi shartnomani bekor qilishni so‘radi. O‘zaro kelishuvga ko‘ra bugundan boshlab Kumikov va jamoa o‘rtasidagi mehnat shartnomasi bekor qilindi.

Shuningdek, o‘z arizasiga binoan katta murabbiy Oleg Korniyenko, murabbiy Roman Uzdenov, jismoniy tayyorgarlik bo‘yicha murabbiy Marat Axmerov va shifokor Mahsudjon Nazarov bilan ham amaldagi shartnomalari bekor qilindi.

Ma’lumot o‘rnida, Viktor Kumikov 2017 yilgi mavsum boshida jamoani qabul qilib olgandi. U o‘tgan davr mobaynida jamoamizni milliy chempionatda 43 o‘yinda maydonga boshlab tushdi. Bu uchrashuvlarda AGMK 15 g‘alaba, 12 durang va 16 mag‘lubiyat qayd etdi. To‘plar nisbati 42:48. Shuningdek, olmaliqlik O‘zbekiston kubogi bahslarida o‘tgan yil 3 o‘yin o‘tkazib, bir g‘alaba va ikki durang qayd etgan bo‘lsa, bu yilgi kubok bahslarida ikki g‘alaba bilan bosh sovrin yo‘lida ishtirokini davom ettirmoqda.

Kecha kunning ikkinchi yarmida AGMK istiqomat qilayotgan "O‘zbekiston" mehmonxonasida jamoa a’zolari ishtirokida yig‘ilish bo‘lib o‘tdi. AGMK futbol klubi bosh direktori Ibrohim Yuldashev jamoada yuzaga kelgan o‘zgarishlar borasida so‘z yuritib, joriy mavsumda jamoani qolgan vaqt mobaynida kim boshqarib borishiga oydinlik kiritdi. Jamoa rahbariyati AGMKni mavsum yakuniga qadar taniqli murabbiy Baxtiyor Ashurmatov boshqarishini lozim topganligi e’lon qilindi. Baxtiyor A’zamovich shu kunga qadar "Buxoro" futbol klubi murabbiylar shtabida faoliyat olib borayotgandi.

Jamoa rahbariyati jamoa oldiga qo‘yilgan vazifa o‘zgarmaganligini ta’kidlab o‘tdi. Shu bilan bir qatorda yangi murabbiyga Olmaliqdagi faoliyati omadli bo‘lishiga tilak bildirildi.

O‘z navbatida Baxtiyor A’zamovich ham so‘z olib, bildirilgan ishonch uchun o‘z minnatdorchiligini bildirdi. Mas’uliyatli yo‘lda, jamoa oldiga qo‘yilgan vazifani ado etish borasida jiddiy ish olib borishini aytib o‘tdi.

Ashurmatovdan tashqari bunga qadar AGMK yoshlar jamoasida faoliyat olib borgan A’zam Sherg‘oziyev ham asosiy tarkibga o‘tkazildi.

Yaqin kunlarda jamoada yuzaga kelgan boshqa bo‘sh o‘rinlarga ham munosib nomzodlar saralab olinadi.