O‘zbekiston futbol assosiasiyasi tomonidan O‘zbekistonda futbol hakamlari malakasini yanada oshirish va yosh hakamlarni tanlab olib, ularni tajribali hakamlar saviyasiga olib chiqish borasida bir qator chora-tadbirlar amalga oshirilmoqda.

Jumladan, O‘zbekiston futbol assosiasiyasi tomonidan yosh hakamlarni tanlab olish va tayyorlash mezonlari ishlab chiqildi. Ana shu mezonlar asosida yosh hakamlarni tanlab olish ishlari Respublikamiz viloyatlarini 4ta hududga bo‘lgan holda olib borilayotgani haqida avval xabar berib o‘tgandik.

Bugungi kunga qadar bir qator viloyatlar bo‘ylab ana shunday seminarlar tashkil qilindi. 6 iyun kuni yosh hakamlarni tayyorlash bo‘yicha seminar Andijonda boshlandi. 

E’tiborli tomoni Andijondagi seminar Qirg‘iziston futbol federasiyasi bilan hamkorlikda o‘tkazilib, ushbu seminarda qirg‘izistonlik yosh hakamlar ham qatnashyapti. Seminar bugun 7 iyun kuni o‘z nihoyasiga yetadi.

Hududlardan saralab olingan yosh hakamlar shu yilning oktyabr oyida Toshkentda o‘tkaziladigan seminar-tanlovda qatnashib, kelajakda hakamlik faoliyati bilan professional tarzda shug‘ullanish imkoniyatini qo‘lga kiritish imkoniga egalar.