Kecha poytaxtimizda dzyudo bo‘yicha «Milliy olimpiya qo‘mitasi sovrini uchun» Ochiq turniri start oldi.
Taekvondo WTF assosiasiyasiga qarashli «Universal» sport majmuasi mezbonlik qilayotgan turnirda dzyudochilardan tashqari kurash, belbog‘li kurash va sambo kabi yo‘nalishlarda faoliyat olib borayotgan sportchilar ham ishtirok etishmoqda. Musobaqani tashkil qilishdan maqsad yuqorida qayd etilgan sport turlarida kashf etilgan polvonlarni dzyudoga yo‘naltirishdir. Shu orqali Olimpiya o‘yinlari oilasiga kiruvchi dzyudoda raqobatni oshirish maqsad qilib qo‘yilgan.
Bugun musobaqaning ochilish marosimi bo‘lib o‘tdi. Bahslarda yurtimizning turli viloyatlaridan tashrif buyurgan 200 nafarga yaqin sportchi o‘z omadini sinab ko‘rmoqda.
Bahslar erkaklar o‘rtasida -60, -66, -73, -81, -90, -100 va +100kg vazn toifalarida, ayollar o‘rtasida esa -48, -52kg, -57kg, -63kg, -70kg, -78kg va +78kg vazn toifalarida bo‘lib o‘tmoqda.
Musobaqada qayd etilayotgan natijalar bilan Milliy olimpiya qo‘mitasi rasmiy saytida tanishishingiz mumkin bo‘ladi.
