Milliy olimpiya qo‘mitasi yangi loyihaga asos soldi. Endi aholi orasida sportni ommalashtirish, ularni sportga qiziqtirish maqsadida joylarda sportning har bir turi bo‘yicha sport sayllari o‘tkaziladi. Bugun ana shunday tadbirdan dastlabkisi poytaxtimizdagi G‘ofur G‘ulom istirohat bog‘ida O‘zbekiston WTF assosiasiyasi bilan hamkorlikda tashkil etildi.
Unda O‘zbekiston taekvondo WTF terma jamoasi a’zolari ishtirokida master-klass namoyish etib berildi. Fristayl pumse bo‘yicha Osiyo chempioni Iroda Umrzoqova, bronza medali sohibasi Aynura Umrzoqova, kerugi bo‘yicha ko‘p karra xalqaro musobaqalar sovrindorlari Nurlan Boyxo‘jayev, O‘zbekiston chempionati sovrindori Muhammadamin Aliyevlar yig‘ilganlarga o‘z mahoratlarini namoyish etdilar.
Tashkilotchilar aynan mana shunday chiqishlar orqali istovchilarni taekvondo WTF sport turiga jalb qilishni o‘z oldilariga maqsad qilib qo‘yganlar. Sog‘ tanda – sog‘lom aql demakdir. Zero, mana shunday sayllar orqali xalq orasida sportga qiziqish yanada kuchayadi. Hali bunday sayllar yana ko‘plab sport turlari bo‘yicha tashkil etilishi rejalashtirib qo‘yilgan.
Sayllar haqida ma’lumotlar Milliy olimpiya qo‘mitasi rasmiy sayti orqali taqdim etib boriladi.
