Pro-Liga 16-turi doirasidagi markaziy o‘yin «Mash’al» - «Dinamo» (0:0) uchrashuvidan keyin «Dinamo» bosh murabbiyi Davron Fayziyev o‘z fikrlarini bildirdi.

- Muborakdagi o‘yindan oldin futbolchilarimizga ushbu bahsda bitta gol o‘yin taqdirini hal etishini ta’kidlagandim. Biz uchun eng asosiysi himoyada mustahkam to‘p surib, vaziyatlarni golga aylantirish edi. O‘yin davomida ikki tomonda ham gol urish uchun imkoniyatlar bo‘ldi. Mezbonlar hujumlari vaqtida darvozabonimiz va himoya chizig‘imiz yaxshi o‘yin namoyish etdi. Bizda ham birinchi bo‘lim yakunida juda yaxshi vaziyat yuzaga kelgandi, ammo hujumchimiz darvoza ustunini nishonga oldi. Bu yil hech kim Muborakda “Mash’al” bilan bahsda ochko olmagandi, biz buni uddaladik. Muborakda peshqadam “Mash’al” maydonidan ochko bilan qaytish yomon natija emas.

Meni ajablantirayotgan jihat, jamoamizning har o‘yinda turli ruhiy holatda tushayotganligidir. Peshqadam jamoalarga qarshi jangovar kayfiyatda, autsayder klublarga qarshi kuchiga to‘g‘ri baho bermaslik kayfiyati borligi meni qoniqtirmayapti. Bu borada ish olib boramiz.

Jamoamizga qo‘shilgan yangi futbolchilar bugun dastlabki o‘yinlarida maydonga tushganliklarini inobatga oladigan bo‘lsak, yaxshi kirishib ketishdi. Akmal Xolmurodov “Dinamo” uchun begona emas, u 3 yil davomida klub sharafini munosib himoya qilgan. Suhrob Izzatov va Abbosbek Jumaqulov singari yoshlarni ijara asosida “Bunyodkor”dan oldik, ulardan ham umidimiz katta.

Keyingi turda dam olamiz, tanaffus oldi so‘nggi turda esa “Norin” bilan maydonga faqat g‘alaba uchun tushamiz. Uchinchi davra oldidan vaziyatni imkonqadar yaxshilashimiz kerak.