18 iyun sanasidan e’tiboran O‘zbekiston chempionatida rasman transferlar oynasi ochilganidan xabaringiz bor. Jamoalar yangi futbolchilarni ro‘yxatdan o‘tkazishni boshlab yuborishdi.
G‘uzorning "Sho‘rtan" jamoasini hozirga qadar 3 nafar futbolchi tark etdi. Jamoa shuningdek, yangi 3 nafar futbolchi bilan shartnoma imzoladi. Akram Bahromov, Shamsiddin Sagdullayev hamda Timur Jo‘rayev G‘uzor klubi bilan xayrlashdi.
Jamoa PFLga mazkur futbolchilar oldida qarzdorligi yo‘q ekani borasidagi hujjatlarni taqdim etgach, "Sho‘rtan"ga ularning o‘rnini yangi ijrochilar bilan to‘ldirib olishga ruxsat berildi.
Natijada "Sho‘rtan" "Bunyodkor" jamoasidan 3 nafar yosh o‘yinchilarni o‘z safiga qo‘shib oldi. Bular – Javohir Musajonov, Farhod O‘tkurov hamda Sardorbek Xursandov.
"Sho‘rtan" bosh direktori Viktor Aleshnikov mazkur o‘yinchilarning iste’dodiga shubxa qilmasligini va ular "Sho‘rtan"ning yetakchi futbolchilari qatoriga qo‘shila olishlariga ishonishini ta’kidladi.
* "Sho‘rtan"ga jamoani tark etgan futbolchilar oldida hech qanday qarzdorligi yo‘q bo‘lgani sababdan yangi futbolchilarni ro‘yxatdan o‘tkazishga ruxsat berildi.
