Joriy mavsumda o‘z oldiga yuksak maqsadlarni qo‘ygan Namanganning “Navbahor” klubi transferlar “oynasi” davrida o‘z tarkibini yana kuchaytirmoqda. 26 iyun kuni kechqurun namanganliklar tarkibiga yana bir xorijlik futbolchi qo‘shildi. Rossiyalik himoyachi Igor Golban jamoa bilan shartnoma imzoladi.

Golban 1990 yil 31 iyulda Rossiyaning Sochi shahrida tug‘ilgan. U futbolchilik faoliyati davomida Rossiyaning “Sochi - 04” (2008), “Jemchujina - Sochi” (2009-2011), “Lokomotiv” (2011-2016), “Shinnik” (2013-2014), “Ximki” (2014), “Sochi” (2014), Chexiyaning “Sigma” (2012-2013), O‘zbekistonning “Qo‘qon-1912” (2015), “Navbahor” (2016 yilning 1-davrasi), “Nasaf” (2016 yilning 2-davrasi – 2018 yilning 1-davrasi) klublari safida to‘p surgan.

Igor 2016 yilning 1-davrasida ham “lochinlar” tarkibida to‘p surib, 14ta uchrashuvda maydonga tushib, 2ta gol urgandi. Shundan keyin esa faoliyatini qarshiliklar tarkibida davom ettirgandi. Golban “ajdarlar” safida 43ta o‘yinda maydonga tushib, 6ta to‘p muallifiga aylangandi.

Rossiyalik himoyachi “Navbahor” tarkibida 5-raqamda o‘ynaydigan bo‘ldi.