Jahon chempionatining pley-off bosqichidagi dastlabki bahs juda chiroyli kechdi. Yettita gol urilgan o‘yinda Fransiya terma jamoasi Argentinani mag‘lub etishga muvaffaq bo‘ldi.

Ayniqsa, 19 yoshli Kilian Mbappe bugungi bahsning haqiqiy qahramoniga aylandi. "PSJ" hujumchisi bahsning 11-daqiqasida butun maydonni katta tezlikda bosib o‘tib, raqib jarima maydonchasiga kirib keldi. Roxo uni qo‘li bilan yiqitdi. Belgilangan penaltini Grizmann golga aylantirdi.

Birinchi bo‘lim tugashiga 4 daqiqa qolganida "albisileste" hisobni tenglashtirishga muvaffaq bo‘ldi. Anxel Di Mariya 30 metrlardan to‘pni darvoza burchagiga joylab qo‘ydi.

Ikkinchi bo‘limning debyuti Messi jamoadoshlari uchun omadli keldi. Argentinaliklar "standart"ni amalga oshirishgan paytda himoyachi uzatmani qaytardi, ammo to‘p Messiga kelib tushdi. Leoning zarbasiga Merkado muvaffaqiyatli oyoq qo‘ydi va gol!

Keyingi 20 daqiqalikda esa Fransiya raqib darvozasini 3 marta ishg‘ol qildi. Dastlab o‘ng qanotdan tashkil qilindi va jarima maydonchasiga uzatma berildi. Himoyachi to‘pni qaytara olmadi. Pavar esa 17 metrlardan shunday zarba berdiki, to‘p olis burchakka kirib ketdi!

Mbappening yulduzli onlari 64 va 68-daqiqalarga to‘g‘ri keldi. Qanotdan yetkazilgan uzatmani Mbappe egalladi, bir fint bilan ikki himoyachi orasida o‘tib ketib, o‘tkir burchak ostida zarba berdi. Armani qo‘llarining ostidan to‘pni o‘tkazib yubordi. Oradan 4 daqiqa o‘tib qarshi hujumda fransuzlar Mbappeni yakkama-yakka vaziyatga chiqarishdi. "PSJ" futbolchisi aniq zarba bilan hisobni oshirdi.

O‘yinga qo‘shib berilgan daqiqalarda Messi tomonidan qanotdan yetkazilgan uzatmani Aguero hujumchisi bosh bilan darvozaga joylab qo‘ydi! Argentina hisobni tenglashtirishi mumkin edi, ammo futbolchi yaqin masofadan aniq zarba bera olmadi.

O‘ta qiziqarli kechgan o‘yinda Fransiya g‘alaba qozondi va chorak finalga yo‘l oldi. Desham shogirdlari chorak finalda Urugvay-Portugaliya juftligi g‘olibiga qarshi maydonga chiqadi.

JCH-2018. Nimchorak final
Fransiya – Argentina 4:3 (1:1)
Gollar: 1:0 – 13, penalti Grizmann, 1:1 – 41 Di Mariya, 1:2 – 48 Merkado, 2:2 – 57 Pavar, 3:2 – 64 Mbappe, 4:2 – 68 Mbappe, 4:3 – 90 Aguero.
Fransiya – Lyoris, Varan, Umtiti, Lyuka Ernandes, Pavar, Matyuidi (Tolisso, 75), Pogba, Kante, Jiru, Grizmann (Fekir, 83), Mbappe (Toven, 89).
Argentina – Armani, Maskerano, Otamendi, Merkado, Roxo (Fasio, 46), Talyafiko, Di Mariya, Banega, Peres (Aguero, 66), Pavon (Mesa, 75), Messi.
Ogohlantirishlar: Roxo (11), Talyafiko (19), Maskerano (43), Banega (50), Matyuidi (72), Pavar (73), Otamendi (90), Jiru (90).