Mamlakatimizda 30 iyun - Yoshlar kuni munosabati bilan Farg‘ona futbol assosiasiyasi viloyatning eng chekka hududlari bo‘ylab futbol musobaqalari tashkil etdi.

Turnirning ilk bosqichi So‘h tumanida o‘tkazildi. "Futbol hamma uchun" deb nomlangan musobaqada So‘h tumanidagi mahalla yoshlari sportning mini-futbol turi bo‘yicha bellashdilar. Unda 2007, 2008 hamda 2009-yilda tug‘ilgan bolalar o‘zaro bellashdilar. Finaldagi "Rovon" hamda "Chashma" futbolchilari o‘rtasidagi o‘yinda "Rovon" jamoasi g‘oliblikni qo‘lga kiritdi. G‘oliblar Farg‘ona futbol assosiasiyasi tomonidan medal, diplom va esdalik sovg‘alari bilan taqdirlanishdi. Shu o‘rinda, So‘h tumani hokimligi va tuman Yoshlar ittifoqi vakillari viloyat futbol assosiasiyasiga tashkil etilgan turnir uchun minnatdorchilik bildirishdi.

"Futbol hamma uchun" turnirining ikkinchi qismi Shohimardon qishlog‘iga ko‘chdi. 100 nafarga yaqin mahalla bolalari o‘rtasidagi turnir ham qizg‘in ruhda kechdi. "Nasriddinboy" va "Dashariq" mahalla yoshlaridan tashkil topgan jamoalar finalga qadar yetib borishdi. Bellashuvni farg‘onalik yosh hakam Oybek A’zamjonov boshqarib bordi. Asosiy vaqtda g‘olib nomi aniqlanmagach, yakuniy natija penaltilar seriyasiga ko‘ra belgilandi. Unda "Nasriddinboy" jamoasi g‘olib keldi. Final bahsidan so‘ng g‘oliblarni taqdirlash marosimi o‘tkazildi.

Nafaqat g‘oliblarga, balki musobaqaning barcha ishtirokchilariga Farg‘ona futbol assosiasiyasi tomonidan medal, diplom, futbol to‘plari, formalar hamda adabiy kitoblar sovg‘a tarzida taqdim etildi. Shuningdek, turnirni barcha o‘yinlarini qiziqish bilan kuzatib borgan imkoniyati cheklangan bolalarga ham "turnirning eng yaxshi muxlisi" nominasiyasi ostida sovg‘alar topshirildi. Farg‘ona futbol assosiasiyasi yil davomida viloyatning barcha shahar va tumanlarida mana shunday turnirlarni o‘tkazishni reja qilgan.