Tailand poytaxti Bangkok shahrida yengil atletika bo‘yicha yoshlar o‘rtasida Osiyo chempionati davom etmoqda.

Musobaqa sportchilarimiz uchun omadli kechmoqda. Kecha ikki nafar hamyurtimiz Regina Adashboyeva (bosqon uloqtirish) va Roksana Xudoyarova (uchxatlab sakrash) lar belgilangan me’yorlarni bajarib, III o‘smirlar Olimpiya o‘yinlariga yo‘llanmani qo‘lga kiritgandilar.

Bir necha daqiqa oldin yana bir hamyurtimiz Buenos-Ayres yo‘llanmasiga ega bo‘ldi. Bosqon uloqtirish bahslarida yurtimiz sharafini himoya qilayotgan Umid Hasanov 64.89 metr natija ko‘rsatib, O‘zbekiston sport delegasiyasi safiga yana bir lisenziyani qo‘shib qo‘ydi.

Qayd etish lozimki, ushbu lisenziya O‘zbekiston terma jamoasi uchun Argentina Olimpiadasiga 29-yo‘llanma bo‘ldi. Shu tariqa, o‘smirlar Olimpiya o‘yinlaridagi rekordimiz yangilandi.

Bungacha O‘zbekiston sport delegasiyasi 2010 yilgi Singapur Olimpiadasida 21 nafar, 2014 yilgi Nankindagi o‘smirlar Olimpiya o‘yinlarida esa 28 nafar sportchi bilan ishtirok etgan. Demak, 2018 yilgi Olimpiya o‘yinlarida bu ko‘rsatkich yangilanadi.

Yengil atletikachilarimiz hali musobaqadagi ishtiroklarini yakunlaganlari yo‘q. Demak, yaqin vaqt ichida lisenziyalarimiz soni yanada ortishi ehtimoldan holi emas. Shuningdek, yaqin 1 oy ichida hamyurtlarimiz sportning suzish, dzyudo va tennis kabi turlarida ham Buenos-Ayres yo‘llanmasini qo‘lga kiritishlari kutilmoqda.