Xabar berib o‘tganimizdek, Toshkent shahri og‘ir atletika bo‘yicha yoshlar o‘rtasidagi Jahon chempionatiga mezbonlik qilmoqda. Ushbu musobaqa doirasida poytaxtimizda Xalqaro og‘ir atletika federasiyasining yillik Kongressi bo‘lib o‘tishi haqida ham ma’lum qilgandik.

Bugun, 6 iyul kuni poytaxtimizdagi «International Tashkent» mehmonxonasida ushbu nufuzli anjuman boshlandi. Unda Xalqaro og‘ir atletika federasiyasi Prezidenti Tomash Ayyan, O‘zbekiston Milliy olimpiya qo‘mitasi Bosh kotibi Jasur Matchanov, mamlakat og‘ir atletika federasiyasi raisi Botir Zokirov, shuningdek, Konfederasiyalar va milliy federasiyalar vakillari ishtirok etishmoqda. Umuman esa Kongressga jahoning 79 mamlakatidan vakillar tashrif buyurishgan.

Kongress davomida bir qator muhim masalalar muhokama qilinishi kutilmoqda. Shuningdek, unda tashkilotning moliyaviy masalalari, antidoping, turli yosh toifalarida musobaqalar tashkil etishga oid hisobotlar ham tinglanadi.

Ma’lumot uchun, og‘ir atletika bo‘yicha yoshlar o‘rtasidagi Jahon chempionatiga ertaga, 7 iyul kuni rasman start beriladi. Musobaqaga poytaxtimizdagi «O‘zbekiston» sport majmuasi mezbonlilk qiladi. Mazkur yirik sport anjumanida ishtirok etish uchun jahonning 50 ga yaqin davlatidan 350 dan ziyod sportchi va murabbiylar, mutaxassislar Toshkentga yetib kelishgan.