Хабар бериб ўтганимиздек, Тошкент шаҳри оғир атлетика бўйича ёшлар ўртасидаги Жаҳон чемпионатига мезбонлик қилмоқда. Ушбу мусобақа доирасида пойтахтимизда Халқаро оғир атлетика федерациясининг йиллик Конгресси бўлиб ўтиши ҳақида ҳам маълум қилгандик.
Бугун, 6 июль куни пойтахтимиздаги «International Tashkent» меҳмонхонасида ушбу нуфузли анжуман бошланди. Унда Халқаро оғир атлетика федерацияси Президенти Томаш Айян, Ўзбекистон Миллий олимпия қўмитаси Бош котиби Жасур Матчанов, мамлакат оғир атлетика федерацияси раиси Ботир Зокиров, шунингдек, Конфедерациялар ва миллий федерациялар вакиллари иштирок этишмоқда. Умуман эса Конгрессга жаҳонинг 79 мамлакатидан вакиллар ташриф буюришган.
Конгресс давомида бир қатор муҳим масалалар муҳокама қилиниши кутилмоқда. Шунингдек, унда ташкилотнинг молиявий масалалари, антидопинг, турли ёш тоифаларида мусобақалар ташкил этишга оид ҳисоботлар ҳам тингланади.
Маълумот учун, оғир атлетика бўйича ёшлар ўртасидаги Жаҳон чемпионатига эртага, 7 июль куни расман старт берилади. Мусобақага пойтахтимиздаги «Ўзбекистон» спорт мажмуаси мезбонлилк қилади. Мазкур йирик спорт анжуманида иштирок этиш учун жаҳоннинг 50 га яқин давлатидан 350 дан зиёд спортчи ва мураббийлар, мутахассислар Тошкентга етиб келишган.
