“Nasaf” – “Navbahor” (1:1) uchrashuvidan so‘ng qarshiliklar bosh murabbiyi Ro‘ziqul Berdiyev quyidagi fikrlarini bildirdi.

“Bugun futbol akademiyamiz tarbiyalanuvchilari, yosh futbolchilarimiz bilan o‘ynadik. Ular tahsinga sazovor o‘yin namoyish etishdi. Qo‘lidan kelgancha o‘ynashdi, hattoki “Navbahor”dek jamoaga ustunlik ham qilishdi. Shaxsan o‘zim bugun maydonga tushgan futbolchilarimizdan minnatdorman. O‘yin boshlanishiga oz vaqt qolganida to‘rt nafar o‘yinchimiz maydonga tushmasligi aniq bo‘ldi. Natijada rejamiz ham, tarkibimiz ham o‘yin boshlanishi oldidan o‘zgarib ketdi. Ikkinchi bo‘limni yana ikkita yo‘qotish bilan boshladik, bu holat ham o‘yinimizga salbiy ta’sir ko‘rsatdi. Bugun asosan yosh futbolchilarimiz maydonga tushishdi, ular g‘alabaga munosib o‘ynashdi. Aniq aytaman, yosh tarkbimiz bugun g‘alabaga loyiq edi. Bu yoshlarimiz o‘zbek futbolining kelajagi. Bu futbolchilar kelgusida Vatanimiz sha’nini munosib himoya qilishadi. Biz O‘zbekiston futboli uchun ishlayapmiz. Demak, bu yosh futbolchilarning kelajagi oldinda. Biz shu futbolchilarimiz bilan ham muxlislarimiz uchun mazmunli va chiroyli o‘yin ko‘rsatishga harakat qilamiz. So‘zim so‘nggida bizga ishqibozlik qilayotgan barcha muxlislarga o‘z minnatdorchiligimni bildirib qolaman, - deydi Berdiyev.