“Насаф” – “Навбаҳор” (1:1) учрашувидан сўнг қаршиликлар бош мураббийи Рўзиқул Бердиев қуйидаги фикрларини билдирди.

“Бугун футбол академиямиз тарбияланувчилари, ёш футболчиларимиз билан ўйнадик. Улар таҳсинга сазовор ўйин намойиш этишди. Қўлидан келганча ўйнашди, ҳаттоки “Навбаҳор”дек жамоага устунлик ҳам қилишди. Шахсан ўзим бугун майдонга тушган футболчиларимиздан миннатдорман. Ўйин бошланишига оз вақт қолганида тўрт нафар ўйинчимиз майдонга тушмаслиги аниқ бўлди. Натижада режамиз ҳам, таркибимиз ҳам ўйин бошланиши олдидан ўзгариб кетди. Иккинчи бўлимни яна иккита йўқотиш билан бошладик, бу ҳолат ҳам ўйинимизга салбий таъсир кўрсатди. Бугун асосан ёш футболчиларимиз майдонга тушишди, улар ғалабага муносиб ўйнашди. Аниқ айтаман, ёш таркбимиз бугун ғалабага лойиқ эди. Бу ёшларимиз ўзбек футболининг келажаги. Бу футболчилар келгусида Ватанимиз шаънини муносиб ҳимоя қилишади. Биз Ўзбекистон футболи учун ишлаяпмиз. Демак, бу ёш футболчиларнинг келажаги олдинда. Биз шу футболчиларимиз билан ҳам мухлисларимиз учун мазмунли ва чиройли ўйин кўрсатишга ҳаракат қиламиз. Сўзим сўнггида бизга ишқибозлик қилаётган барча мухлисларга ўз миннатдорчилигимни билдириб қоламан, - дейди Бердиев.