Xorvatiya terma jamoasi yarim himoyachisi Ivan Perishich Angliyaga qarshi bo‘lib o‘tgan Jahon chempionatining yarim final bahsida jarohat oldi.

«Ren TV» telekanali rasmiy sayti tarqatgan xabarga ko‘ra, o‘yindan keyin xorvatiyalik futbolchi Moskvadagi klinikalardan biriga yotqizilgan. Hozirda Perishichning o‘ng tizzasi tibbiy ko‘rikdan o‘tkazilmoqda. Hozircha jarohatning holati qay darajada ekaniga oydinlik kiritilmadi. 3 kundan keyin bo‘lib o‘tadigan final bahsigacha futbolchi sog‘ayishga ulgurmasligi mumkin.

Eslatib o‘tamiz, Ivan Perishich yarim finalda o‘z hisobiga bitta gol va golli uzatma yozdi hamda uchrashuvning eng yaxshi futbolchisi deb topildi.

Xorvatiya terma jamoasi jahon chempionati finalida Fransiyaga qarshi maydonga tushadi. O‘yin 15 iyul kuni Moskvadagi «Lujniki» stadionida bo‘lib o‘tadi.