Yoshlar ligasi 18-turida “So‘g‘diyona” o‘rinbosarlari o‘z maydonida “Lokomotiv” yoshlarini qabul qildi va ishonchli 2:0 hisobida g‘alaba qozondi.

Jamoani yaqindagina qabul qilib olgan Bobur Zuxriddinov boshqaruvidagi ilk g‘alaba bo‘ldi.

O‘yindan so‘ng o‘rinbosarlar bosh murabbiyi Bobur Zuxriddinov uchrashuv borasida o‘z fikrlari bilan o‘rtoqlashdi.

-Avvalo o‘rinbosarlar jamoasiga befarq bo‘lmagan barcha muxlislarni g‘alaba bilan tabriklayman. Bugungi o‘yinda o‘ylagan rejamiz amalga oshdi. Birinchi bo‘limda ko‘proq ximoyaga e’tibor qaratgan bo‘lsak-da , ikkinchi bo‘limda bir kishi kam bo‘lib harakat qilganimizga qaramay xujumga e’tibor qaratdik. O‘yin shiddatli bo‘lishini kutgan edik. Shuning uchun ham bir nechta rejalarni amalga oshirishga harakat qildik. “So‘g‘diyona” o‘rinbosarlarini qabul qilganimdan so‘ng uchinchi o‘yinni o‘tkazdim. Yoshlarda 12 o‘rinda borayotganiga qaramay o‘ziga bo‘lgan ishonch juda past. Hozirgi kunda nafaqat jismoniy, balki ruxiy tayyorgarlik ham yaxshi bo‘lishiga e’tibor qaratayapmiz.Bugungi o‘yinda futbolchilar o‘zgacha ishonch bilan harakat qilishdi. Ayrim kamchiliklarni ustida ishlasak o‘ylaymanki bir qator futbolchilar asosiy tarkibda ham bemalol raqobatni yuzaga keltira oladi.

-Jizzaxda ko‘plab yosh va iqtidorli futbolchilar bor. O‘smirlar jamoasida ham iqtidor egalari bisyor. Jizzax viloyatida ikkinchi liga musoboqasi o‘tkaziladi. Ulardan ham yoshlarni saralab, o‘rinbosarlar tarkibiga ko‘rikka taklif etish rejamda bor.Kelajakda jizzaxlik yosh charm to‘p ustalari nafaqat “So‘g‘diyona” shuningdek, superliganing boshqa klublarida, O‘zbekiston terma jamoalari va xorij maydonlarida ishonchli o‘yin ko‘rsata olishiga ishonaman.

“So‘g‘diyona” PFK matbuot xizmati