Milliy olimpiya qo‘mitasida O‘zbekiston Jismoniy tarbiya va sport universitetining bu yilgi qabul jarayoniga bag‘ishlangan katta yig‘ilish bo‘lib o‘tdi.
Unda Milliy olimpiya qo‘mitasi Bosh kotibi Jasur Matchanov, Jismoniy tarbiya va sport universiteti o‘quv ishlari bo‘yicha prorektori Komiljon Yarashev, universitet professor-o‘qituvchilari, sport federasiyalari rahbarlari hamda ommaviy axborot vositalari xodimlari ishtirok etishdi.
Ma’lumki, bu yildan boshlab alohida iqtidor talab etadigan yo‘nalishlarga, shu jumladan sport yo‘nalishidagi oliy ta’lim muassasalariga ham talabalar test sinovlarisiz qabul qilinadilar. Unga ko‘ra, bu yil Jismoniy tarbiya va sport universitetiga hujjat topshirgan abituriyentlar mazkur ta’lim muassasasida mavjud 27 hil sport yo‘nalishiga test sinovlarisiz, ijodiy imtihonlar asosida talabalik bahtiga muyassar bo‘lishlari mumkin bo‘ladi.
Jismoniy tarbiya va sport universiteti rektorining ma’lum qilishicha, bu yil qabul uchun 5665 nafar abituriyent hujjat topshirgan. Ularning 75 nafari imtiyozli qabul asosida, Jismoniy tarbiya va sport vazirligi tavsiyasiga binoan universitetda tahsil oladi.
Shaffoflikni ta’minlash maqsadida har bir sport turi bo‘yicha ijodiy imtihonlarda sport federasiyalar vakillari ishtirok etadilar. Nohush holatlar, turli qing‘irliklarga yo‘l qo‘yilgan taqdirda Milliy olimpiya qo‘mitasida 24 soat davomida faoliyat olib borayotgan qaynoq liniya 205-5-205 telefon raqamlari ishlab turgani qayd etildi.
Imtihonlar qat’iy tekshiruv asosida, olimpiya zaxiralari kollejlari, katta ko‘rgazma zallarida tashkil etiladi. Buning uchun Davlat test markazi, huquqni muhofaza qilish organlari tomonidan tayyorgarlik ko‘rib qo‘yilgan. Imtihon jarayonlarida har bir mas’ul o‘z ishiga sidqidildan yondoshishi lozimligi, qabulni halol va shaffof tarzda tashkil etish kerakligi yana bir marotaba eslatib o‘tildi, ta’bir joiz bo‘lsa talab qilindi.
25 iyul – 5 avgust kunlari o‘tkaziladigan qabul imtihonlariga ommaviy axborot vositalari ham taklif qilindi. Uchrashuv davomida jurnalistlar shuningdek, o‘zlarini qiziqtirgan bir qancha savollarga javob olishdi.
