Shu yildan boshlab O‘zbekiston hamda Ispaniya futbol ligalari o‘rtasida yaqindan hamkorlik yo‘lga qo‘yildi.
La Liganing yangi mavsum taqvimiga ko‘ra, «Barselona» hamda «Real» o‘rtasidagi birinchi El Klasiko 28 oktyabr kuni «Kamp Nou»da bo‘lib o‘tadi. PFL hamda La liga o‘zaro hamkorlikda bu o‘yin targ‘ibotini yurtimizda ham yanada kengaytirish maqsadida, shu kuni poytaxtimizdagi «Milliy» stadionida «Ommaviy El Klasiko» tadbirini o‘tkazishni rejalashtirgan.
Mazkur tadbir doirasida Ispaniya va O‘zbekistonning faxriy futbolchilari ishtirokida ko‘rgazmali futbol o‘yini tashkil etish mo‘ljallanmoqda. Unda har ikki jamoa tarkibida ham bir nafardan mashxur sobiq «charm to‘p» ustalari qatnashishi ko‘zda tutilgan. «Ommaviy El Klasiko» tadbiri UzReport telekanali orqali yoritib boriladi.
Ko‘rgazmali futbol bahsidan so‘ng, stadionga yig‘ilgan muxlislar katta ekranda «Barselona» – «Real» o‘yinini tomosha qilishi mumkin bo‘ladi.
