Krishtianu Ronaldu bugun “Yuventus” safida ilk mashg‘ulotini o‘tkazdi. Kecha portugaliyalik futbolchining shaxsiy samoleti Turinga qo‘ndi va har doimgidek uni tumonat muxlislar kutib oldi.

Bugun ertalab Ronaldu bir-nechta jismoniy nazoratlarni topshirdi va murabbiylar shunga qarab, mashg‘ulotlar rejasini tuzib chiqdi. Ushbu mashg‘ulot soat 15:00ga (Toshkent vaqti bilan 18:00) boshlanishi kerak edi, lekin futbolchilar bazaga kechikib keldi. Krishtianu bilan mashg‘ulotlar zalida Iguain, Dibala, Kuadrado, Duglas Kosta va Bentankur shug‘ullandi. Ular JCHda qatnashishgani bois qisqa ta’til olishgan edi.

“Yuve”ning qolgan futbolchilari Massimo Allegri bilan International Champions Cup musobaqasida ishtirok etish uchun AQSHda bo‘lib turibdi. Jamoa ikki haftadan so‘ng Italiyaga qaytadi. Bu vaqt mobaynida Allegrining birinchi yordamchisi Aldo Dolchetti Turindagi futbolchilar bilan mashg‘ulotlarni o‘tkazadi. Ular deyarli 30 yildan beri birga ishlaydilar. Maks assistentini AQSHdan Ronalduni kutib olish uchun Italiyaga jo‘natgan.

Ma’lumot uchun, 33-yoshli Ronaldu uch hafta avval “Yuventus” futbolchisiga aylandi.

KriRo “Real”da 9 yil faoliyat olib bordi. “Yuve” Ronaldu bilan 4 yillik shartnoma imzoladi. Uning yillik maoshi 31 million yevroni tashkil etadi.