Криштиану Роналду бугун “Ювентус” сафида илк машғулотини ўтказди. Кеча португалиялик футболчининг шахсий самолети Туринга қўнди ва ҳар доимгидек уни тумонат мухлислар кутиб олди.
Бугун эрталаб Роналду бир-нечта жисмоний назоратларни топширди ва мураббийлар шунга қараб, машғулотлар режасини тузиб чиқди. Ушбу машғулот соат 15:00га (Тошкент вақти билан 18:00) бошланиши керак эди, лекин футболчилар базага кечикиб келди. Криштиану билан машғулотлар залида Игуаин, Дибала, Куадрадо, Дуглас Коста ва Бентанкур шуғулланди. Улар ЖЧда қатнашишгани боис қисқа таътил олишган эди.
“Юве”нинг қолган футболчилари Массимо Аллегри билан International Champions Cup мусобақасида иштирок этиш учун АҚШда бўлиб турибди. Жамоа икки ҳафтадан сўнг Италияга қайтади. Бу вақт мобайнида Аллегрининг биринчи ёрдамчиси Альдо Дольчетти Туриндаги футболчилар билан машғулотларни ўтказади. Улар деярли 30 йилдан бери бирга ишлайдилар. Макс ассистентини АҚШдан Роналдуни кутиб олиш учун Италияга жўнатган.
Маълумот учун, 33-ёшли Роналду уч ҳафта аввал “Ювентус” футболчисига айланди.
КриРо “Реал”да 9 йил фаолият олиб борди. “Юве” Роналду билан 4 йиллик шартнома имзолади. Унинг йиллик маоши 31 миллион еврони ташкил этади.
