Мадриднинг “Атлетико” клуби ҳужумчиси Хулиан Алвареснинг “Барселона”га ўтиши деярли имконсиз ишга айланди. “Кўк-анорранглилар” раҳбарияти ушбу трансферни амалга ошириш устида қанчалик фаол ишламасин, молиявий муаммолар тўсқинлик қилмоқда. Бу ҳақда Sport.es нашри хабар бермоқда.

Манбага кўра, икки клуб ўртасидаги музокаралар “матрасчилар” футболчининг якуний нархини 100 миллион евродан юқори қилиб белгилагунига қадар жуда муваффақиятли кетаётган эди. Бундан ташқари, аргентиналик форвардга Франциянинг “ПСЖ” клуби ҳам даъвогарлик қила бошлаган. Парижликлар каталонияликлардан фарқли ўлароқ, Мадрид клуби сўраётган суммани тўлиқ тўлашга тайёрлигини билдирган.

“Барселона” трансфер нархини пасайтириш мақсадида келишувга бир нечта футболчиларини қўшишни таклиф қилган. Жумладан, каталонияликлар трансферга Марк Бернал, Фермин Лопес ҳамда Роналд Араухо каби футболчиларни қўшиш вариантларини кўриб чиққан. Бироқ “Атлетико” “Барселона”нинг ушбу таклифига кескин рад жавобини берган.

Мадридликлар Алваресни фақатгина нақд пул эвазига сотмоқчи, бу эса молиявий қийинчиликларни бошдан кечираётган “Барселона”ни трансфер пойгасидан чиқариб юбориши мумкин.