.jpg)
Moziy mulkiga aylangan JCH-2018 nafaqat muxlisu mutaxassislar, balki musobaqa qatnashchilariga ham olam-olam quvonch ulashdi. Albatta, «baxt» tushunchasini har kim turlicha talqin qiladi.
Shaxsan mening fikrimcha, Rossiyadagi futbol bayramidan eng ko‘p zavq-shavq olgan kishi Tyerri Anri bo‘ldi. U 1998 yili o‘z yurtida Fransiya terma jamoasining yosh hujumchisi sifatida jahon kubogini boshi uzra baland ko‘targandi.
20 yildan keyin Tyerri yurtdoshlarining navbatdagi tarixiy zafarlariga guvoh bo‘ldi, o‘zi esa Roberto Martinesning assistenti sifatida Belgiya termasining bronza medallariga sazovor bo‘lishiga munosib hissa qo‘shdi.
Mundial bahonasida ana shu baxtiyor insonning faoliyatini yodga olishni lozim topdik.
LEZ-YULISDAN KLERFONTENGA QADAR
Yevro-1984 finalida Mishel Platini va Bryuno Bellonning Ispaniya darvozasiga yo‘llagan javobsiz to‘plari Fransiyada qizg‘in nishonlanayotgan paytda Tyerri hali 7ga ham to‘lmagandi.
Parij yaqinidagi Lez-YUlis shaharchasida to‘pni qo‘ltiqlab olganicha osmondagi yorqin mushakbozlikka mahliyo bo‘lgan bolakay qachondir shunday rang-barang tantananing sababchisi bo‘lishni diliga tugib qo‘ydi. «Bolaligimdan kulrang manzaradan ko‘nglim qolgan. Biz to‘p surgan maydon atrofidagi uylar, ularning devorlari aynan shu ko‘rimsiz tusda edi», - degandi Anri keyinchalik.
Bo‘lajak yulduzning onasi Martinikadan, otasi esa Gvadelupedan bo‘lib, Fransiyaga farovon hayot ilinjida kelishgandi. O‘shanda Mariz Tyerriga homilador edi. Otasi - Antuan bo‘sh paytlarida futbol o‘ynab turardi. Tez orada jajji Tyerri otasiga taqlid qila boshladi.
Sal o‘tmasdan shunchalik qiziqib qoldiki, o‘zidan ikki yosh katta bolalar bilan tengma-teng o‘ynaydigan bo‘ldi. Keyinchalik 13 yoshli vunderkind «Viri-SHatiyon» klubi tarkibida 26 marta maydonga tushib, 76ta gol urdi.
«U to‘p bilan oldinga tashlangan paytda hech kim to‘xtatib qola olmasdi», - degandi Tyerrining birinchi murabbiyi Klod Shezel.
Anri o‘zining futboldagi ilk qadamlarini amalga oshirgan paytdan otasi uning doimiy muxlisi bo‘ldi. Garchi ular keyinchalik kam ko‘rishadigan bo‘lib qolishgan bo‘lsa ham. Tyerri 8 yoshga chiqqanida juftlik ajrashib, bolakay onasi bilan Orse tumaniga ko‘chib o‘tdi.
14 yoshga to‘lganida Anri 3 yil avval ochilgan Klerfonten akademiyasiga qabul qilindi. Mamlakatning eng mashhur maskanida u Nikolya Anelka, Vilyam Gallas va Lui Saa kabi iqtidor sohiblari bilan yonma-yon saboq oldi.
VENGER BILAN TANISHUV
O‘zining 16 yoshini nishonlash arafasida Tyerri «Monako» skautlari nazariga tushib, Arsen Vengerni qiziqtirib qoldi. Knyazlik klubining o‘sha paytdagi bosh murabbiyi ko‘p o‘ylab o‘tirmadi - 1993 yilda Anri «Monako» yoshlari safidan joy oldi.
1994 yilning yozida esa, ikki hafta avval 17 yoshini bayram qilgan iqtidorli hujumchi asosiy tarkibdagi debyutini nishonladi. To‘g‘ri, ilk uchrashuvlar omadsiz kechdi - jamoa o‘z maydonida «Nissa»dan yengildi. Vaholanki, o‘shanda Lilian Tyuram, Emmanuel Peti va Yuriy Jorkayeff kabi nomdor futbolchilar Anri bilan yonma-yon to‘p surishgandi.
«Monako» keyingi o‘yinda ham ochko ololmadi: «Gavr» - 0:1. «Renn» bilan nursiz durang (0:0) qayd etilgach, mutasaddilar Vengerni iste’foga chiqarishdi. Bir amallab o‘z o‘rnini saqlab qolgan Anri esa, Jorkayeffning uzatmasini fantastik golga aylantirdi. Ammo o‘sha pallada 4 yildan so‘ng uni qanday muvaffaqiyat kutayotganidan ham, Arsen Venger bilan yana uchrashishidan ham yosh hujumchi bexabar edi.
JAHON FUTBOLI TOJI
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
