Superliganing 21-turi doirasida "Lokomotiv"ga (1:1) qarshi uchrashuvdan keyin "Neftchi" bosh murabbiyi Bahrom Haydarov o‘z fikrlarini bildirib o‘tdi.
"Birinchi bo‘limda "Lokomotiv" juda kuchli o‘yin namoyish qildi. Tan olish kerak, ushbu raqib safida mahoratli futbolchilar yig‘ilgan, ularga qarshi ikkinchi raqamli jamoa bo‘lib, yopiqroq o‘ynash kerak.
Bahsgacha qarshi hujumda o‘ynashni rejalashtirgandik, ammo buni eplay olmadik. Bunga sabab sifatida 4-5 nafar yoshlarimizda hayajon sezildi. Shu boisdan, to‘p bilan nazorat eplay olmadik, ko‘p bora oddiy paslarda to‘pni yo‘qotdik, to‘pni ko‘proq ushlab, "Lokomotiv"ning bosimini kamaytirishga intilgandik.
O‘yinning boshida konsetrasiyani yo‘qotib qo‘ydik. Bee’tiborlik tufayli uchrashuv boshida o‘yinga kirisha olmadik. Ammo yigitlarga rahmat aytaman. Ular qo‘rquv hissini yo‘qota olishdi. Shundan keyin to‘pni nazorat qila boshladik. Ikkinchi bo‘lim boshida yigitlar chiroyli o‘yin ko‘rsatishdi va ishonch ortib ketdi. Himoya yaxshi o‘ynadi va bahs yakunlanib borayotgan vaqtda gol urdik.
