Milliy olimpiya qo‘mitasi matbuot va media departamenti «Shohsupa sari yo‘l» loyihasida Osiyo o‘yinlarida ishtirok etadigan sportchilarimiz bilan qisqa intervyular tashkil etib kelmoqda.
Bugun Osiyo o‘yinlarining ikki karra chempioni, yengil atletikaning balandlikka sakrash turi bo‘yicha O‘zbekiston terma jamoasi a’zosi Svetlana Radzivil savollarimizga javob qaytaradi.
Sportga qay tarzda kirib kelgan?
Maktabimizga murabbiy kelgan va mashg‘ulotlarga taklif qilgandi. Sport to‘garagiga qatnay boshladim. Bu menga juda yoqib qoldi va albatta hozir ham yoqadi. 18 yildan beri o‘z sevgan ishim, ya’ni yengil atletika bilan shug‘ullanib kelaman.
Ortiqcha vazn kerak emas
To‘g‘ri ovqatlanish qoidasiga rioya qilishga harakat qilaman. Vazn kamaytirish uchun bu borada biroz cheklovlar bo‘lishi mumkin. Men balandlikka sakrash bilan shug‘ullanganim sababli ortiqcha vazn umuman kerak emas.
Havas qiladigan sportchisi
Har bir sportchini hurmat qilaman. Chunki, katta sport ko‘pchilik o‘ylaganidek oson emas.
Chempionlik haqidagi fikri
Chempion bo‘lish oson emas. Buni zanjirga o‘xshataman. Uning har bir bo‘lagi 100 foiz ishlashi lozim. Ammo, biz barchamiz tirik jonmiz. Ba’zida o‘ylagan rejalarimiz amalga oshishiga halal beradigan omillar bor. Ammo, men o‘z oldimga qo‘ygan maqsadim sari intilayapman. Ayni paytdagi eng asosiy maqsadim Osiyo o‘yinlarida chempion bo‘lishdir.
