Bugun, 27 avgust kuni Indoneziyada bo‘lib o‘tayotgan Osiyo o‘yinlarining to‘qqizinchi kuni o‘tkazildi.

Kun davomida o‘zbekistonlik sportchilar uchta medal qo‘lga kiritishdi.

Karate bo‘yicha -50kg vazn toifasida yurtimiz sharafini himoya qilgan Bahriniso Babayeva musobaqa davomida Filippin, BAA hamda Tailand vakillarini mag‘lubiyatga uchratib finalga yo‘l oldi. Hal qiluvchi jangda esa Xitoy Taypeyi sportchisi Shiashuang Guga 2:3 hisobida imkoniyatni boy berdi va yakunda kumush medalga sazovor bo‘ldi.

Badiiy gimnastikaning jamoaviy bahslarida ishtirok etgan qizlarimiz (Sabina Tashkenbayeva, Nurinisso Usmonova, Dildora Rahmatova va Asal Ikromova) umumiy hisobda 155,3 ball to‘plab, ikkinchi natijani qayd etishdi va yakunda kumush medalni delegasiyamiz hisobiga qo‘shib qo‘yishdi.

Og‘ir atletikada +105kg vazn toifasida yurtimiz sharafini himoya qilgan Rustam Djangabayev dast ko‘tarishda 203, siltab ko‘tarishda esa 252kg toshni o‘ziga bo‘ysundira oldi. Umumiy hisobda 455 kg natija ko‘rsatgan hamyurtimiz yakunda bronza medali egasiga aylandi.

Osiyo o‘yinlarining to‘qqizinchi kuni yakunlariga ko‘ra, terma jamoamiz sportchilari 31ta medalni qo‘lga kiritishgan. Hamyurtlarimiz ayni paytda 6ta oltin, 13ta kumush va 12ta bronza medallariga ega chiqqanlar.