Бугун, 27 август куни Индонезияда бўлиб ўтаётган Осиё ўйинларининг тўққизинчи куни ўтказилди.
Кун давомида ўзбекистонлик спортчилар учта медаль қўлга киритишди.
Каратэ бўйича -50кг вазн тоифасида юртимиз шарафини ҳимоя қилган Баҳринисо Бабаева мусобақа давомида Филиппин, БАА ҳамда Таиланд вакилларини мағлубиятга учратиб финалга йўл олди. Ҳал қилувчи жангда эса Хитой Тайпейи спортчиси Шиашуанг Гуга 2:3 ҳисобида имкониятни бой берди ва якунда кумуш медалга сазовор бўлди.
Бадиий гимнастиканинг жамоавий баҳсларида иштирок этган қизларимиз (Сабина Ташкенбаева, Нуриниссо Усмонова, Дилдора Раҳматова ва Асаль Икромова) умумий ҳисобда 155,3 балл тўплаб, иккинчи натижани қайд этишди ва якунда кумуш медални делегациямиз ҳисобига қўшиб қўйишди.
Оғир атлетикада +105кг вазн тоифасида юртимиз шарафини ҳимоя қилган Рустам Джангабаев даст кўтаришда 203, силтаб кўтаришда эса 252кг тошни ўзига бўйсундира олди. Умумий ҳисобда 455 кг натижа кўрсатган ҳамюртимиз якунда бронза медали эгасига айланди.
Осиё ўйинларининг тўққизинчи куни якунларига кўра, терма жамоамиз спортчилари 31та медални қўлга киритишган. Ҳамюртларимиз айни пайтда 6та олтин, 13та кумуш ва 12та бронза медалларига эга чиққанлар.
