Indoneziyaning Jakarta va Palembang shaharlarida bo‘lib o‘tayotgan Osiyo O‘yinlarida o‘zimizga "tegishli" bo‘lgan yo‘nalishda oltin va kumush medallarini qo‘lga kiritdik.

Ayollar o‘rtasida o‘tkazilgan balandlikka sakrash bahslarida Svetlana Radzivil va Nadiya Dusanova muxlislarga qiziqarli mashqlarni taqdim etishdi. Sportchilar 165 sm.dan boshlab sakrashni amalga oshira boshlashdi. 180 sm.ga kelib, sahnada bor-yo‘g‘i 4 nafar sportchi qoldi. 184 sm. balandlikdan esa Nadiya va Svetlanadan tashqari qozog‘istonlik Nadejda Duboviskaya uchinchi urinishda sakrab o‘tdi va bronza medalini hal qildi.

Atletlarimiz esa oltin medal uchun o‘zaro kurashni davom ettirishdi. Ustunlik goh u, goh bu sportchi tomoniga o‘tdi. Ular 188, 191 va 194 sm.ni zabt etishdi. Nihoyat balandlik 196 sm.ga ko‘tarildi. Radzivil ilk urinishdayoq bu marrani zabt etdi hamda o‘ziga tegishli Osiyo O‘yinlari rekordi (195 sm, Guangjou-2010) rekordini yangiladi. Nadiya esa avval bundan sakray olmadi va to‘siqni 198 sm.ga ko‘tarishlarini so‘radi. Ammo uning urinishlari samarali chiqmadi.

Shu tariqa, Svetlana Radzivil ketma-ket uchinchi marta Osiyo O‘yinlari g‘olibiga aylandi. Dusanova esa Guangjou-2010da kumush, Inchxon-2014dagi bronzadan keyin, yana kumush medalini qo‘lga kiritdi.