Indoneziyada bo‘lib o‘tgan Osiyo o‘yilari musobaqasida O‘zbekiston sharafini himoya qilib, nufuzli o‘rinlarga ega chiqqan sportchilarga qancha pul mukofoti ajratilishi ma’lum qilindi. 

Unga ko‘ra, O‘zbekiston milliy olimpiya qo‘mitasi musobaqada oltin medal olgan sportchilarga 10 ming dollar mukofot puli ajratadi. 

Osiyo o‘yinlarida O‘zbekiston sharafini 30 sport turi bo‘yicha 234 nafar sportchi himoya qildi. Ularning 21 nafari oltin, 24 nafari kumush hamda 25 nafari bronza medalni qo‘lga kiritib, vatanga qaytdi. 

O‘zbekiston sport delegasiyasi medallar sifati bo‘yicha 45 mamlakat ichida 5-o‘rinni egalladi. 

Shuningdek, Hukumat tomonidan avval belgilangan tartibga ko‘ra, Osiyo o‘yinlari sovrindorlari bo‘lgan barcha sportchilarga pul mukofotlari ajratilgan. 

Aniqrog‘i, Osiyo o‘yinlari g‘olibiga aylangan sportchilar uchun 5 ming dollar, kumush medal egalariga 3 ming dollar va bronza medal sohiblariga 2 ming dollardan pul mukofotlari beriladi. 

Shunday tartibda oltin medal egalari MOQ va Hukumat tomonidan 15 ming dollar mukofot puli qo‘lga kiritadilar. Taqdirlash marosimi yaqin kunlar ichida o‘tkaziladi. 

MOQ kumush va bronza egalariga qanchadan mukofot puli berilishi haqida keyinroq ma’lumot beradi.